بلطجة عيني عينك

طبعاً أنا بعمل في 6 اكتوبر و مقيم في حي الجيزه فطبيعي بركب عربيه جيزه دائري من الموقف اللي قدام مساكن الشباب في الحي السادس السوق القديم انهارده حوالي الساعه 3 ركبنا العربيه اللي المفروض الاجره بتاعتها 2 جنيه و نص كالمعتاد لكن فوجئنا انا و الركاب ان السواق بيقول ان الاجره بقت 3 جنيه سئلناه ليه قال بتاع الكارته خلى الاجره 3 جنيه و بقى بياخد 5 جنيه كارته بدل 2 جنيه ونص لكن طلبنا منه انه يا اما ياخد اجرته او يرجع و رجع فعلا الموقف و توجه مجموعه من الناس علشان يكلموا الراجل بتاع الكارته اللي في الصوره ديه و اسم شهرته "ابو شهد" كان معانا راجل عمره حوالي 65 سنه كلمه و ازاي تغلوا الاجره وقالنا هو كده واللي مش عاجبه يشتكي طبعاً احتدينا في الكلام معاه و خصوصاً الراجل الكبير في السن راح الراجل قال ايه يا ولاد الم**** وراح ساببلنا الدين و قالنا هو خلاص بعد الثوره كل واحد هيتكلم و راح سابب الدين للثوره الراجل العجوز زعقله راح مطلع مطوه و رافعها على الراجل وقال اي حد هيتكلم و سب الدين لينا كلنا و سب الدين للبلد و جه واحد تاني و قال اللي هيتكلم هطلع وسب الدين سواء كبير او صغير و راح لكل السواقين و قالهم الاجره 3 جنيه واللي مش عاجبه يشتري عربيه و هو ده النظام و كانه المحافظ طبعاً الناس قعدت تهديه و هو قعد يقول انا علشان ساكت بعد الثوره كله هيتكلم ده انتوا شباشب الناس قالوله ده راجل عجوز معلشي قال ده لو " ابن ربنا" هطلع وراح سابب الدين و انتهى الموضوع اننا ركبنا عربيه بأجره 3 جنيه وقالوا ده شغال تبع المحافظه هل موظف المحافظه بيرفع مطوه على المواطنين؟؟
السؤال دلوقتي :-
الشخص ده قام بالتالي:
1- تغليه الاجره بدون وجه حق الخمس.
2- سب الدين للناس وللثوره.
3-سب الذات الإلاهيه.
4- ترويع المواطنين و فتح مطوه قرن غزال عليهم.
ده اللي هو عامله و هيستمر يعمله طول ممفيش حد بيحاسبه زمان في انتخابات الاعاده راجل عجوز قالي اللي استفاد من الثوره البلطجيه بس انا قولتله لأ مصر هتبقى دوله قانون و البلطجه هتنتهي . هل كنت بكذب عليه.
الأنسان ده لازم يتم إتخاذ موقف رادع و فوري معاه علشان يكون عبره للكل احنا لازم منسكتش ونبقى سلبيين انا وضحت الموضوع و كده قمت بدوري كمواطن بيطالب بدوله القانون و القبض على البلطجيه
يا ترى ايه موقف كل من:
1- السيد وزير الداخليه.
2- السيد وزير النقل.
3- السيد محافظ الجيزه.
4- السيد مدير امن اكتوبر.
5- السيد رئيس الوزراء.
6- السيد رئيس الجمهوريه.
7- الأحزاب الكبرى اللي بتعمل انشطه خدميه.
الموضوع يبان بسيط بس كون ان واحد يبلطج على الناس علشان معاه مطوه و يستغل الموقف ويرفع الاجره والكارته براحته في دوله القانون مظنش ان ده هيكون شئ مبشر
انا عملت اللي عليه و صورت الراجل و حكيت القصه و مكنتش سلبي و سكت هل الموضوع هيقف عندي ولا هيكون فيه موقف مع الشخص ده و غيره اتمنى الناس كلها تعمل شير و اتمنى التصرف مع الشخص ده و جعله عبره حتى تنتهي البلطجه من مصر والموقف ده حتى لو صغير و في مكان صغير بس لو حصل قصاده رد فعل هيغير فكر ناس كثير و هيخلي اي بلطجي يفكر الف مره قبل ميروع المواطنين
اتمنى الكلام ينتشر و يكون فيه رد فعل
الراجل موجود في موقف عربيات الجيزه الي في السوق القديم قدام محل عصير القصب و السنترال اللي في دخله الشباب و اسمه ابو شهد