"أنا عايزة أتجوز" يُشعل "فيس بوك".. ودعوات لتسهيل تكاليف الزواج

تحت عنوان "أنا عايزة أتجوز"، كتبت ماجي رابي، إحدى المدونات على موقع التواصل الاجتماعي "فيس بوك"، منشورًا عبر صفحتها على "فيس بوك"، وعبرت من خلاله عن آرائها في تأخر الزواج، وأمنياتها في الزوج الذي ترغب في الارتباط به.
وكتبت "ماجي" في منشورها: "أنا عاوزة أتجوز وده حقيقي، بس مش عاوزة أتجوز واحد يبقى مجبر إنه يجيب لي شبكة ب30 ألف مثلا، أنا عاوزة دبلة بس، ولو حكم الأمر يجيب لي فضة، مالها الفضة، أنا من عشاق الفضة، وقيمتها عندي أعلى مليون مرة من الدهب".
وأضافت "ماجي": "مش مجبر إنه يجيب شقة تمليك أقل حاجة ب250 ألف، مالها الشقق الإيجار، مساحة كويسة وتشطيب كويس، وعقد مثلا يكون 3 سنين بزيادة سنوية، أهو نبتدي فيها حياتنا وربنا يسهل ويكرم بعد كده.. مش مجبر يفرش 5 أوض.. ليه؟ طيب والله ليه؟! سفرة ونيش، صالون وأنتريه، وغرفتين نوم، ليه؟ ده إحنا 2 ولو ربنا كرم بعد سنتين هنبقى 3.. ليه 5 غرف!".
وتابعت قائلة: "مش مجبر يعم لي فرح ب100 ألف.. أنا عاوزة Dj في البيت والأهل والأحباب والأصدقاء ينوروا عندنا، ونفرح وصوت فرحتنا يجلجل لحد الفجر.. نقضيها جاتوه وبيبسي، ما هو خلينا متفقين إن المعازيم كده كده هتتكلم حتى لو عملناه في أحسن مكان في مصر".
وأكملت: "أنا عاوزة أعيش مرتاحة مع حد بحبه، وفيه بينا تفاهم، وعهد إن الزعل بينا مايدمش أكتر من ساعة، ودي لما تكون زعلة جامدة يعني، هو أنا لما أطلق هاعمل إيه بالقايمة، هرجع بيت أمي بحب عفش وشوك وسكاكين!! دول مثلا هينسوني حلمي اللي اتكسر وطلاقي".
واختتمت بقولها: "بس نعمل إيه في العادات والتقاليد اللي جيبانا في الأرض يوم بعد يوم".
وقد شهد منشور "ماجي" تداولا كبيرا بين رواد موقع "فيس بوك"، تعدى ال4000 إعجاب، فضلا عن نحو 1500 مشاركة، بالإضافة إلى التعليقات التي جاءت عبر المنشور التي أعرب كتابها عن إعجابها بفكرها، ودعا الكثيرون إلى تخفيض المهور والشبكة لتسهيل الزواج.
يُشار إلى أن مصر تشهد خلال السنوات الماضية ارتفاعًا في أعمار الزواج للشباب والفتيات على حد سواء، وللفتيات بنسب أكبر، وأرجع بعض الدراسات السبب وراء ارتفاع سن الزواج إلى ارتفاع المهور وغلاء أسعار المعيشة وعدم قدرة الشباب على تكاليف الزواج.
وكان بعض الحملات الإلكترونية قد أطلقها عدد من الشباب مؤخرًا لتسهيل تكاليف الزواج من خلال الارتباط بدبلتين فقط دون شبكة أو مهر أو قائمة منقولات.