ارتفاع أسعار الخضراوات بأسواق طنطا.. والأهالي: "هنجيب منين"

يعاني أهالي مدينة طنطا، التابعة لمحافظة الغربية، والقرى المجاورة من الارتفاع الجنوني في أسعار الخضراوات وسط عدم رقابة من الحكومة على الأسواق.
ووصل سعر كيلو الطماطم ل6 جنيهات والبامية إلى 10 جنيهات، وتراوحت أسعار الفاصوليا من 19 ل22 جنيها للكيلو، بينما وصلت سعر الكوسا من 7 إلى 9 جنيهات والبصل من 2 ل3 جنيهات للكيلو، كما تراوحت أسعار الباذنجان من 3 ل4 جنيهات، والفلفل الرومي والبلدي يتراوح بين 5 و6 جنيهات، والفلفل الألوان ل8 جنيهات، والملوخية من 4 إلى 6 جنيهات.
وكان لشبكة "رصد" تواجد بين الأهالي في إحدى الأسواق، لرصد آرائهم في ذلك الارتفاع في الأسعار؛ فقال محمود علي، موظف: "السبب في ارتفاع الأسعار عدم وجود رقابة حقيقية على الأسواق من الحكومة وترك المشتري فريسة لجشع تجار الجملة والتجزئة وده مش جديد علينا ولا أول مرة.. إحنا عايشين طول عمرنا أسعار الخضراوات والفاكهة واللحوم بتزيد بمزاج التجار دون مراعاة لينا ولظروفنا ولأنهم مش لاقيين رقابة عليهم تجبرهم على الالتزام بالسعر الحقيقي".
وشاركت أم هشام، معبرة عن استيائها من ارتفاع الأسعار: "أسعار الخضار هنا بقت مولعة نار مش عارفين نشتري حاجة على بعضها، الخيار والفلفل والطماطم ب6 جنيهات و5 جنيهات والليمون ب9 و10 جنيهات، يعني علشان نعمل طبق سلطة بس هيكلفنا شوية كتير، أنا يادوب بنزل في إيدي 20 جنيها بجيب من كل حاجة نص كيلو علشان أكفي نفسي وأعرف أجيب حاجه أطبخ بيها".
كما شاركت إحدى بائعات الخضراوات، مشيرة إلى أن سبب ارتفاع الأسعار يرجع لتجار الجملة، والذين يتحكمون في الأسعار، قائلة: "الخضار بنجيبه من سوق الجملة غالي علينا طيب هنعمل إيه، احنا بنجيب عداية الطماطم ب60 جنيها والباذنجان بنجيبه من قلب سوق الجملة ب3.5 جنيهات، وبتاع المحشي الأبيض بنجيبه ب4 جنيهات، الحاجة بتجيلنا غالية والزبون مامعهوش يشتري وإحنا بنفضل فارشين من صباحية ربنا لا عارفين نبيع ولا عارفين نشتري، الناس غلابة بتيجي تشتري بالنص كيلو والربع كيلو هيعملوا إيه، احنا عاوزين الرئيس والحكومة ياخدوا بالهم مننا شوية أحسن كده حرام إحنا بني آدمين زيهم برضه".