آخر كلام

 يعنى الدنيا كلها والعة من حوالينا..والأعداء بيتربصوا بينا.. والبلد كلها فى حالة استنفار كامل.. ومصر كلها عن بكرة أبيها.. قيادة وحكومة وشعبا مشغولة بالدفاع عن الحقوق الوطنية والعربية..
وفى ظل هذه الظروف الصعبة اللى ما يعلم بيها إلا ربنا.. يخرج لنا واحد من إياهم، اللى بقى إعلامى فى غفلة من الزمن، بخطب عنترية لإثارة الفتنة بين جماهير الكورة؛ بحجة الدفاع عن حقوق ناديه وحقوق الكابتن زعيط ومعيط ونطاط الحيط.. وكأن الحكاية ناقصة بسلامته..!
حاجة تقرف بصراحة..!
 يا ناس يا هو.. أنا على مدى نصف قرن كنت أول من حذرت من "نصباية" شركات توظيف الأموال.. وكتبت فى ذلك عشرات التحقيقات الاستقصائية والأحاديث والمقالات.. حتى أننى حصلت على جائزة التفوق الصحفى من نقابة الصحفيين عن أحد تلك التحقيقات.
وأذكر أننى أجريت حوارًا طويلاً عريضًا، من أربعين سنة مع صاحب أكبر شركة توظيف آنذاك وهو "الريان"؛ وكان عنوانه "شركات توظيف الأموال فى حارة اليهود"..
اعترف فيه الريان باللعب بفلوس الناس فى البورصات الأمريكية.. وإن سمساره يهودى وبياخد فوايد ربوية إلى آخر تلك الاعترافات التى قالها بعضمة لسانه؛ والتى تؤكد أن الحكاية كلها على بعضها نصب فى نصب..
لكن البعض عندهم ذاكرة السمكة.. بدليل وقوعهم ضحايا فى عملية النصب الأخيرة بتاعة " إف بى سى".
أعتقد إن هذه الظاهرة تحتاج إلى دراسة عميقة من علماء النفس والاجتماع والاقتصاد.. لمعرفة أسبابها.. ومحاولة الخروج بحلول عملية لمنع تكرارها مستقبلا.. لعل وعسى..!
 عجبنى قوى الرئيس الفرنسى ماكرون؛ اللى زنق الحاج أبو حنان فى الكورنر.. وقال له فى عقر داره: كل اللى بتقوله كدب فى كدب.. والصح كذا وكذا.
وخرج من عنده وهدد بالنووى إذا تخلى البيت الأبيض؛ اللى عمره ما بينفع فى اليوم الأسود، عن الدفاع عن حلفائه الأوروبيين..!
بصراحة قعدة الرئيس الفرنسى وثقته بنفسه وببلده وكلامه، اللى مرة بالإنجليزية ومرة بالفرنسية، أربك ساكن البيت الأبيض المنتشى بغروره وخلاه يفوق شوية من أحلامه.. ويقعد عوج ويتكلم عدل..!
 إذا صح إن "النتن" نفى ابنه خارج الكيان الصهيونى؛ لأنه ضربه بالجزمة القديمة على أم رأسه.. فدا أمر طبيعى خالص..!
فأبوه اللى رباه؛ زى ما الدنيا كلها عارفاه قاتل ومجرم حرب برخصة وحرامى أراضى.. فبديهى جدًا إنه يخلف ولد مش متربى يضربه بالجزمة وبالشبشب الزنوبة كمان..!
وعلى رأى اللى قال: واحد تربية على علوكة وأشرف كخة هايطلع إيه يعنى ..؟!
أكيد بلطجى..!!