المصرى أبو عين واحدة

للأسف المصريين شعب معظمه بعين واحدة، فعندما أتأمل صفحات أصدقائى على الفيس بوك مش بلاقى غير لونين يا أبيض يا أسود، تلاقى الثورة عندهم وحشة على طول الخط ، مابيشوفوش غير الفيديوهات والصور المسيئة للثورة والثوار، ويجروا ينشروها ويتمسخرواعلى الثورة، ومينسوش يختموا تعليقاتهم بالتعليق الشهير الذى يدل على أخلاقهم «جتكم نيلة خربتوا البلد» أما الشباب اللي زى الورد من دكاترة ومعيدين وطلاب كليات القمة والشيخ الأزهرى فمش بيشوفوهم، لأن عينهم التانية فيها عماص مبارك، بيتجاهلوها عمداً وبطريقة مستفزة، وطبعاً اللى بيتجاهلوها أحسن من اللى بيقولوا دى متفبركة. أما الثورجية، عينهم التانية شغالة زى الفل، المشكلة فى عينهم الأولانية اللى بتشوف ثورة ثورة حتى الموت، والثورة عندهم شتيمة وشرشحة وطولة لسان، واللى واقف جنبهم وبيهتف زيهم يبقى حبيبهم ، أما إذا فكر يهدى اللعب، أو يقول فى ناس غلط بتستفيد من المشاكل اللى بنعملها، ويفكرهم بالشعار الأصلى «سلمية سلمية» يبقى خاين للثورة وعميل، وبنفس منطق كارهى الثورة ، تلاقى الفيديوهات والصور اللى بتبين ظلم وتجبر الأمن بتنتشر بينهم بسرعة الف شير فى الدقيقة، والفيديوهات والصور اللى تثير الريبة - أنا بقول مجرد تثير الريبة مقلتش إنها ضدهم - بيطنشوها وكأنها لم تكن، لا يعطوا لأنفسهم فرصة لمراجعة النفس وبينساقوا وراء رموز الثورة الخايبين.. الندابات والمسخناتية والمهولاتية والمفبركاتية، جملة أخيرة.. ربنا خلق لنا عينين اتنين عشان نشوف الصح والغلط ونفرق بينهم. أحمد عسكر