آخر كلام!!

* والله الواحد محتار فى موضوع الاستفتاء على التعديلات الدستورية النهاردة.. فكلنا محتارين وعاملين بالضبط زى ما بيقول الموسيقار فريد الأطرش: «مأقدرش أقول آه ومأقدرش أقولا لأ»، فكلنا فى اختبار صعب أصعب من امتحان الفيزيا بتاع الثانوية «العميا».
كل ما نتمناه هو أن يقول الشعب رأيه بحرية من أجل تحقيق الخير والاستقرار والأمن والأمان والنماء لمصرنا الحبيبة.. اللهم آمين.
* أسوأ دعاية للجراح البرازيلى لياسير ريبيرو هى أن يقول إنه أجرى عملية جراحية للعقيد القذافى ليبدو أكثر شبابا..!
بذمتك يا عم ريبيرو دى خِلقة معمولّها عملية تجميل..؟ واضح أن حضرتك عملت له العملية فى ورشة سمكرة ودوكو بشنيور ومفتاح تلاتاشر.
أنا لو من القذافى لأطاردك بالتوك توك بتاعى من بيت لبيت ومن «زنجة.. لزنجة» باعتبارك واحداً من الجرذان وشذاذ الآفاق..!
* شفتوا التهريج وصل لحد فين..؟!
تلامذة الثانوية تظاهروا من أجل تخفيف المناهج وتسهيل الامتحانات.. وتلامذة الابتدائى بسيناء تظاهروا من أجل إضافة طعم الفراولة للحليب..!
مش بعيد بعد كده يخرج بتوع «كى جى ون» فى مظاهرة يطالبون فيها بحقهم فى لبس بامبرز لا يتسرب إليه البلل أبداً.. يعنى ب 7 طبقات.. وأستك..!
* بالمناسبة.. بعد أن تظاهر مرشدو السياحة للمطالبة بزيادة الأجر اليومى من 60 إلى 500 جنيه.. أى والله.. 500 جنيه يومياً أى 15 ألف ملطوش شهرياً.. نويت والنية لله أنى أسيب الصحافة وأشتغل «صبى مرشد».. يعنى أجهِّز السُياح للمُرشد وأحمّيهم كل يوم بالليفة والصابونة وأمسح وأكنس وأرش مَيّة قدام الهرم وأبوالهول، بالإضافة لعمل كافة شىء.. بس المهم.. أتلايم على الفكة..!
* كلمة ورد غطاها:
* شفت السجين بتاع شبين الكوم اللى عايز يرجع سجن أبو زعبل بعد ما هرب منه ومارضيوش يرجعوه لأن السجن تحت التشطيب..!
ما هوه اللى غلطان كان يشوف له سجن إيجار جديد أوضتين وصالة وعفشة ميّة يتحبس فيهم لغاية نهاية مدته..!