مصر الحلوة راجعة تاني

عشان نوصل لكده لازم ندرس تاريخنا المصري لأولادنا في جميع مراحل التعليم باعتباره أهم من أي تاريخ آخر غير مصري مع التركيز علي فترات الأزمات والنهضة والحضارة
ناس شايفة إني بحلم أن مصر ممكن ترجع حلوة تاني زي زمان وأحسن من زمان كمان، وكأن الحلم رفاهية لا نستحقها إحنا المصريين ونسينا أن الإنجازات العظيمة بتبدأ دايما بحلم وفكرة أوحتي صدفة، وعشان مصر ترجع حلوة جميلة تاني محتاجين إننا نحس بالجمال في أنفسنا إحنا المصريين ونسعي ليه، إحنا اللي في غفلة من الزمان نسينا معني الجمال بعد ماكان ناسنا وشوارعنا المصرية من 30سنة بس تنطق بالجمال في كل شئ، واللي ماعاش ولا شافش يتفرج علي فيلم اسود وابيض، أو يروح يزور معبد او مقبرة فرعونية وهو هيعرف الفرق كنا إيه وبقينا إيه النهارده.
من 30 سنة تقريبا وقبلها طبعا كان لبسنا مختلف شياكة وازواق عالية، من 30 سنة ماشفناش تحرشات جنسية في شوارعنا بالرغم من المظهر الديني اللي موجود النهارده، من 30 سنة شوارعنا كانت نضيفة، بيوتنا جوه وبره كانت جميلة، حتي مناطقنا الشعبية كانت تنطق جمالا، أجسامنا كانت نحيفة، أخلاقنا رفيعة.
سألت البعض هو ليه بقي شكلنا في الشارع كده مش حلو زي زمان، أجسامنا تغيرت شالت كليوات من الدهون مش باينة في ملابس مش ملابسنا غيرناها استبدلناها، يعني بالبلدي كده غيرنا توبنا فبقينا مش مصريين، شكلنا، وبالتالي هويتنا ضاعت، تاهت ياولاد الحلال، ياولاد الحلال حد شاف بلد تايهة ياولاد الحلال، حد شاف شعب نسي ومش عارف انه مصري وبس، شعب محتاج يعرف ويعرف ويعرف، وتدب الروح فيه تحييه ونعيد له الأمل،روح تشعره بوجوده وقيمته الحقيقية، روح تشعره انه ممكن يقوم تاني مارد مصري زي ماكان فبل ما ينسي انه مصري،روح مصر العظمة روح الحضارة، روحة المتغطية بالرمال زي كنوزنا، يلا نكشف عن الكنز والجوهرة اللي اسمها (مصر )
من 60 سنة لما بلدنا كان لسه اسمها مصر، زي ماكان من آلاف السنين لغاية وتحديدا قبل ثورة او انقلاب يوليو كما وصفه القيادي الثوري حسين هيكل كنا مداينين انجلترا بأكثر ب 3 ملايين جنيه إسترليني ومصر محتلة من الانجليز، وده بيوضح أد إيه اقتصادنا كمان كان قوي عفي، ماهو لما تبقي مصر قوية عفية بتبقي عفية في كل المجالات ولما بتعيا كلها بتنصاب وتأن من الألم والآسي، ولكن شدة الألم والمصاب هو اللي بيولد أجسام مناعية قوية عشان تخلص من اللي صابها ونابها ونخلص من اللي نابنا وصابنا احنا المصريين النهارده، كلنا بنحاول عايزين نرجع مصر قوية، عفية، حلوة زي زمان وأجمل من زمان كمان.
مصر مرت في عمرها الطويل بأزمات أصعب بكتير من الأزمة اللي بنمر بها دلوقتي وكان دايما اللي بينقذها ويصلح أحوالها إننا إحنا المصريين كنا دايما بنستلهم روح وحضارة أجدادنا العظام ونبعث الروح المصرية الضاربة في عمق التاريخ، روح أحمس وتحوتمس لغاية عرابي وسعد زغلول، وكل مرة كنا بنعمل فيها كده كنا بنخرج من أزمتنا وبنوصل لحضارة أحسن من اللي قبلها.
وعشان نوصل لكده لازم ندرس تاريخنا المصري لأولادنا في جميع مراحل التعليم باعتباره أهم من أي تاريخ آخر غير مصري مع التركيز علي فترات الأزمات والنهضة والحضارة، وتشجيع كل اللي يساعد علي إحياء الروح المصرية المستقلة حتي اسم الدولة الرسمي نفسه ممكن نراجعه عشان نمصر مصر ويرجع لها اسمها تاني (مصر) زي ما ذكر في كل الأديان باسمها المصري القديم ( الفرعوني ) من آلاف السنين " مصر ".
facebook/Azzasoliman