مساء الخير.. انكسفوا علي دمكم!!

آه من كدابين الزفة والارزقية بتوع التلات ورقات اللي كل حركاتهم وافعالهم قرعة ومكشوفة..!! قال ايه: المصريين دول ملائكة الله في الارض وان جميع الافعال الشيطانية التي تصدر عن البعض منهم ليسوا بمصريين بل دخلاء من جنسيات أخري مهجنة لا تعرف لهم أصل ولا فصل..!! فمصر بلد الامن والامان وكنانة الله في الارض وقد اصطفاها الله سبحانه وتعالي عن سائر البلدان بذكرها في اكثر من موقع بالقرآن الكريم وقد تزوج منها رسول الله ووصف رجالها بخير جنود الارض..!! كلام جميل وكلام معقول ما قدرش اقول حاجة عنه..!! ولكن اذا كانت كل الافعال الشيطانية التي تصدر من أناس ليسوا بمصريين فمن هؤلاء الذين يدهسوا مصر بأرجلهم ويسحقونها ويحملون الجنسية المصرية ويدينون بدين الاغلبية من شعبها..!!نعم من حقك ان تتحدث كما تشاء وتقول ما تشاء..!! من حقك ان تربي شنبك ورموشك و تطلق لحيتك او تلبس ما تشاء..!! من حقك ان تصبح درويشا من دراويش السلف الصالح..!! ولكن ليس من حقك ان تضحك علي وتقول ان هناك مصريين مش مصريين وان علبة الكبريت فيها فيل..!! ليس من حقك ان تهيمن علي مقدراتي وان تلهف اموالي وتسحق آمالي تحت دعوي ان المصريين الموجودين اليومين دول مش مصريين..؟! معقولة الكلام ده.. اطالب بحقي تلوي لي بوزك ثم تفشخ بقك بضحكة هايفة و شوية تحمرلي عنيك وتقولي انت مين ؟ أنت مش مصري..؟!! وعندما اقول لك .قف. ما تفعلة ليس عاداتنا ولا أخلاقنا تمتعض وتحكم علي بالتمرد والعصيان والخروج علي الشرعية..!! آه منكم يا ولاد الابالسة يا شياطين الإنس تقتلوا القتيل وتمشوا في جنازته وتقولوا بكل بجاحة احنا مش عارفين ليه كل الزيطة والزمبليطة والهجوم الشرس علي الوطنيين داخل هذا البلد الكريم..؟! يا جماعة الخير دي كلها حاجات فارغة ما تستاهلش..!! ربنا يدينا ويديكم طولة العمر وتستحملوا كمان وكمان.. هو احنا لسه عملنا حاجة..؟! وصلوا علي النبي لأن الحسد اليومين دول شغال علي ودنة..!! علي بلاطة كده..‘ احنا اللي دوخنا الشيطان ودخلنا ولاد الابالسة الاصلاحية ياخونا يا حاقدين نحن بنكسب ثواب في الانسانية..!! عاوزين ايه تاني.. خلينا الشيطان يكلم نفسه ولففناه كعب داير حوالين نفسه وكمان مش عجبكم..؟! آه ياولاد الجنية صحيح اللي اختشوا ماتوا..!! والنبي ياخونا انكسفو علي دمكم وحطوا حصوة ملح رشيدي في عينكم..!! فرحنين اوي انكم غلبتم الشيطان في ألاعيبه وحركاته..!! سعداء أوي من الفقر والغلب والحقد والغل والكسل والخمول اللي بنتميز فية بين دول العالم..!! جعلتم الناس تستطعم الفقر والذل والمهانة والبهدلة تحت دعوي البحث عن لقمة العيش والستر..!! ضحكتم عليهم بكلمات معسولة من رجال مغشوشين بأن ما هم فيه ما هو الا ابتلاء وامتحان من الله سبحانه وتعالي..!! خلطتم بين الفقر والذل والبهدلة وبين الزهد والورع..!! جعلتوهم عجزة عن امتلاك زمام الامور وهو اساس ضياع الدنيا والدين ..!! جعلتم منهم دراويش نكدية كسولة خمولة مكنهم الله في الارض فتركوها تحت دعوي كل شيء فاني متناسين ان الله خلقهم ليتباهي بهم بين الامم يوم القيامة..!! يا عالم يا ضلالية اعرفوا ان الابتلاء من الله ليتعظ الانسان فيما فعل ويرجع عما هو فيه من ضلال..!! واعلموا ان ما اصاب المصريين من جهل وعفن وقلة حيلة وفقر وغلب وقهر هو من افعالكم واحاديثكم المعسولة المغلوطة دون ان تعرفوا أو تعرفوا..!! واعلموا ايضا ان الحياة يمتلكها من اجتهد في طلبها ووقف علي اسرارها ولا عزاء للضعفاء والمساكين المقهورين ..!!يا جماعة الخير طوق النجاة يكمن في وعي الامة بكل ما يدور حولها وان أي محاولة لدهس المصريين وسحقهم نصيبة كبري علي الجميع ..!! فأنا ان قدر الاله مماتي لا تري الشرق يرفع الرأس بعدي...؟!! واخيرا كفاية عليكم كده...صدعتم دماغي.. وقلبت مخي.. ووجعتوا قلبي.. منكم لله.