مساء الخير..مصري.. ولاّ؟!

مساء
الخير
مصري.. ولاّ؟!
ينقطع لسان كل اللي يقول كلمة وحشة علي مصر هو فيه إيه..؟! هي سايبة ولاسايبة..؟! كل واحد تحصله مشكلة أو واحد يزعله أو أمه تضربه علي قفاه.. يجري ويطلع غلبه كله شتيمة في مصر واللي جايبين مصر.. واليوم الإسود اللي اتولد فيه مصري..!! أنا مش عارف.. يعني ايه يشتم مصر ومين انت تكون ياللي بتشتم مصر..؟!
في المقولات المأثورة للزعماء المصريين زي مصطفي كامل حينما قال قولته المشهورة.. ان لم اكن مصرياً لوددت أن اكون مصرياً.. ولاد الإيه تناولوها بالهزل والنأورة الفارغة..!!
بصراحة دول مش مصريين.. دول أجناس أخري متخفية في هيئة وزي المصريين..!! لأن المصري اللي بجد صح لايمكن ان يصدر منه قلة الأدب في حق بلده مصر..!!
يا عالم ياللي ما فيش في قلبكم رحمة ولا شفقة.. مصر الغالية علينا.. كثير من الشهداء ضحوا بأرواحهم ودمائهم وحياتهم علشان غيرهم يعيش مرفوع الرأس..! وتيجي إنت النهارده تسب وتشتم في بلد تمنها غالي أوي عند شعبها الأصلي مش التقليد..!!
مصر يا إخوانا أم العرب وقلب الامة العربية وعقل إفريقيا واللي مش مصدقني من الناس اللي عندها عقل وفكر يبص ويشوف مركزنا فين داخل محيط الشرق الأوسط..!!
أما شوية الشكحلية والأونطجية اللي واكلين لحمهم وبيلعبوا التلات ورقات يشوفوا بلد تانية يرموا جتتهم عليها.. وبلاش يعملوا كده مع مصر.. عشان مصر كبيرة أوي أوي آه.. يازمن..! القوالب نامت والانصاص قامت..!! فين الرجالة بتوع زمان..؟! فين أحفاد احمد عرابي ومصطفي كامل وسعد زغلول وعبدالله النديم.. فين أبطال 56 وفين عبدالعاطي ورفاقه في 73..؟! جايين النهارده تقولوا كلام فارغ مشبوه عن مصر والمصريين أسياد العالم..!
أنا يا إخوانا حفيد هاجر المصرية أم إسماعيل ابن أبو الانبياء ابراهيم..! أنا مصري ابن مصري أتحدث اللغة العربية..! تاريخ أصيل وحضارة عريقة وشموخ وعظمة ودماء تجري في عروقي تقول أنا المصري.. مهد الحضارات وشموخ العظماء.. وللأسف الشديد ييجي النهارده شوية نوطعية لاشغلة ولا مشغلة وما تعرفش أصلهم ولا فصلهم ويدعوا بالباطل علي مصر والمصريين..!! في حين ان المصري الأصيل لايهمه لا أكل ولا شرب.. زي ما يهمه كيف يعيش حراً رافع الرأس..!! زي ما قال الشاعر المصري الأصيل احمد شوقي.. نحن اليواقيت خاض النار جوهرنا.. يعني هنا ان المصريين زي الياقوت كلما اشتدت بهم الظروف وحتي ولو وضعوا في النار يزدادون حلاوة وبريقاً..!!
بالمناسبة قال لي أحد مدعي السياسة من السياسيين إياهم واللي واضح انه مخلط وليس مصرياً أصيلاً قال وبراءة الاطفال في عينيه والخبث يملأ جفونه انت زعلان ليه..؟! من فضلك فهمني بشويش إيه الحكاية وإيه اللي بيحصل في البلد دي..؟! ومين مع مين..؟! ومين ضد مين..؟! ومين بيضحك علي مين..؟! ومين بيفتري علي مين..؟! وإيه حكاية انتشار الاونطجية بتوع التلات ورقات..؟! رديت عليه بعصبية ونرفزة.. نعم ياعمنا.. هو انت خواجة ولا إيه..؟! بصراحة أنا مش داخل مخي انك مصري ولاسياسي..؟! صحيح ناس لها بخت وناس لها ترتر..!! معقولة في ناس ما تعرفش حاجة عن اللي بيحصل..؟! ولا هو سايق العبط علي الشيطنة ومصدر العبيطة اعتقاداً منه ان المصريين اللي بجد المأصلين مش موجودين اليومين دول..!! ولاّّّ أنا العبيط ومش واخد بالي ان البلد بقي فيها مصريين مخلطين من جنسيات أخري.. لايهمهم البلد ولا اللي بيحصل فيها ولايوجد انتماء عندهم زي حبايبنا اللي بيقولوا انهم مصريين ويروحوا عند اليهود ويتزوجوا منهم..؟! مصر يا إخوانا موجودة والمصريين لازالوا موجودين المأصلين بحق اللي تاريخهم مكتوب علي صفحة النيل والقناة..!!
مصر يا أصيلة ياست الحسن.. انت الاب وأنت الأم.. يا أحلي مافينا تنادينا.. بالليل بالصبح تلاقينا.. هانور بيك ليالينا.. ونقدم أرواحنا هدية..!! ياعالم ياللي مخلطين لقد أعز الله الاسلام بفتح مصر..! ومنها انطلق الاسلام لفتح المغرب العربي في الاندلس..! وأعز الله الاسلام بمقاومتها الصليبيين من الغرب..! وأعزها بصد غزوات التتار والمغول من الشرق..!! واعلموا ايها الحمقي المشوشين المشغولين بالأكل والشرب ومتعة زائلة ان الخناق والحصار علي الامة العربية والاسلامية هو خناق وحصار علي مصر حتي تسقط صريعة مثل العراق وينتهي المركز التاريخي الذي يوحد الاقطار العربية..! فجندها خير اجناد الأرض.. وشعبها في رباط إلي يوم القيامة.. واعلموا..
أنا إن قدر الإله مماتي.. لاتري الشرق يرفع الرأس بعدي.