"سراويلا" سقطت من ذاكرة المسئولين.. أهالي القرية: مشروع الصرف الصحي متوقف من 2009 .. ولا يوجد مدرسة واحدة في 8 قري

يعاني أهالي البحيرة عدد من المشكلات ونقص الخدمات ومنها مشكلة الصرف الصحي ونقص المياه والمدارس ومراكز الشباب, اضافة إلي غرق الكباري التي انشأها الأهالي بجهود ذاتية بسبب انعدام الصيانه اضافة إلي مشكلات النظافة..

فى البداية يقول الحاج محمود حربى احد ابناء القرية محتاجين اى قطاع خدمى يخطر على بالك القرية لا مدرسة ابتدائى ولا اعدادى ولا حضانة ولا فرن عيش ولامستوصف ولا مكتب بريد ولا معهد دينى كل الخدمات فى البر التانى كنا عاملين معديات عملت مشاكل عملنا الكوبرى على حسالنا نقلناه فى 2009 زهرة هى اللى انشغلت بهمومنا وساعدتنا فى نقل الكوبرى ودلوقت بعد ما غرق لانه لم يتم عمل صيانه له من ايام حسنى مبارك كانت ثورة يناير ثورة سودة علينا مفيش حاجة اتعملت فى البلد من يومها الصرف وقف وكله اتعطل معندناش اى قطاع خدمى خالص عايزين احلا ل وتجديد معمول للكوبرى ميزانية 305 الف جنية على حسابنا
دلوقت لما وقع وغرق غرقنا كلنا ومصالحنا اتشلت شلل تام والعيال لم يذهبوا الى مدارسهم ولا حتى رحنا شغلنا انعزلنا عن العالم وعلى فكرة احنا تابع لقرية بولين ومجلس قرية بولين نايممجاش البلد الا لما غرقنا عندنا 8 قرى مفيش مدرسة واحدة قرية سراويلا ويونس والوحدانية وعبد الغنى هيبه والسطح والمغاربة لا مدارس حتى ابتدائى ولا اى خدمات ..... ويضيف الحاج ابراهيم الديب ناهيك عن الطريق مجلس قرية بولين اهتم بالقرى المحيطه به وتركنا على الاطراف الطريق ده كان طريق مصر اسكندرية القديم عملوا طرق فرعية على الاراضى الزراعية وسابوا الطريق الرئيسى وكمان معندناش صرف صحى ويضيف على شعبان ابراهيم الطريق لا يصلح للبهايم مش البشر بيرصفوه من 94 لسة ما خلص ويضيف على شحاته العيب فى ادارة منطقة كفر الدوار للاصلاح الزراعى عندنا مخازن خالية مهجورة من زمن وعايزين حتى مدرسة او مستوصف كل ما نعمل اجراء يعطلوه عايزين زيارة على الطبيعة من لجنة من وزارة الزراعة البلد محرومة من حاجات كتير من عشرات السنين لا مدرسة ولا صرف ولا بريد ولا اسفلت اى شوية مطر يبوزوا الارض محدش بيبص لنا خالص اول جرنال يوصل لنا انتم الميه لا توصل البيوت الا بمواتير ومش صالحة للشرب كمان ويضيف سعد عبد الرسول الكهرباء قارى ومحصل للبلد القارى قاعد على مكتبة يقدر بمزاجه تقدير جزافى بصيت فى العداد لقيت ليه عندهم الف كيلو عايزين اللواء مصطفى هدهود واللواء السيد عيسى يبصوا للبلد حرام مجلس قرية بولين نايم فى العسل ومبيتشغلش واعضاء مجلس الشعب بنشفهم ايام الانتخابات بس ومبيعملوش حاجة قالوا حيعملوا اسفلت من 97 مشفناش حاجة
المسئولين الاسفلت يدخل لحد بيوتهم وفى اراضى زراعية كمان عشان مسئولين اهم حاجة عايزنها دلوقت الطريق والكوبرى يصلح ويركب الرحمة يا ناس ويضيف محمد مسعد بدوى عايزين عضو مجلس محلى من قريتنا يتكلم باسمنا وعايزين لجنة من الزراعة على الطبيعة نصابين الاصلاح باعو ارضنا لموظفين معاهم لكن الحمد لله رجعناها ويضيف الحاج رمضان بسيونى من 2009 جات لجنة من الطرق وشركة حسن علام والمياه وسكرتير المحافظ وعملوا محضر بالاعمال وقالوا فى خلال 90 يوم كله حيخلص ولسه ال60 يوم مخلصوش حتى الان ويضيف الحاج فتحى عبد الحميد السيد عندنا ارض منزوع ملكيتها من الاصلاح من 2000 لحد انهارده لم ينفذ عليها اى مشروع فدان ونمص بورناهم ودفعنا تمنهم ومتعملش عليهم اى مشروع والزباله والدبان والكلاب والتعابين بتموت فى عيالنا والزباله محاوطة البيوت والمرض موت عيالنا والله 35 قيراط اعملوا عليهم مدرسة معهد دينى مستوصف مركز شباب اى حاجة تخدم البلد مجلس القرية ورئيس المدينة واعوانه نايمين فى العسل
ويضيف شريف محمد ياسين احنا بناكل من المصرف والمجارى ومات طفل الاسبوع اللى فات من المجارى والصرف مصرف الصرف وترعة الرى ترعة حسب الله لها قنطرة ومجدوله ترعة صرف رسمية بتغذى 1600 فدان مفتوحة على المجارى والصرف واحنا بناكل احنا والبلاد اللى جنبنا من ريها والامراض بتزيد 30000 ثلاتين الف نسمة معزولين عن العالم نساهم المسئولين ويضيف عماد جمال عبد المسيح كل بيت بياخدو منه 3 جنيه نظافة ومفيش نظافة واللى ميدفعش يتعملوا محضر وجرار الزباله مبيجيش من 3 سنين والزبالة مالية البلد ومفيش اى خدمات من الوحدة المحلية للقرية وللمدينة احنا فى عالم تانى والتعابين والدبان مالى البلد من الزبالة ومجلس القرية والمدينة مفيش ضمير بصاغ ويضيف محمد حسين شراكى اهم حاجة دلوقت عايزين اى وسيلة مواصلات توصلنا لشغلنا وتوصل العيال لمدارسهم فى معديات خاصة عايزة من خمس عيال كل يوم 10 جنيه رايح جاى نجيب منين احنا معزولين عن العالم من عهد حسنى مبارك كانت ثورة يناير ثورة سودة علي البلد خربت الدنيا دلوقت جابو ونش وطلعوا الكوبرى مصالحنا كلها اتعطلت نعمل ايه يا مسئولين ارحموا من فى الارض يرحمكم من فى السماء