"شعبولا" يغني لإنفلونزا الخنازير

القاهرة: كعادته في مواكبة الأحداث يستعد المطرب الشعبى شعبان عبد الرحيم لتسجيل أغنية جديدة عن مرض أنفلونزا الخنازير بعد أقل من 4 أيام على إعلان انتشار المرض.
الأغنية يطالب فيها شعبولا بضرورة إتخاذ قرار سيادى بإعدام جميع الخنازير فى مصر، وينصح فيها المواطنين بالجرى فور مشاهدتهم أى خنزير.
وقال إسلام خليل مؤلف الأغنية أنه منذ قرأ فى الصحف أخباراً عن انتشار مرض " أنفلونزا الخنازير" قرر كتابة الأغنية مشيراً انه اتصل بشعبان وأبلغه بخبر انتشار المرض الجديد، فقال "هو فى حاجة اسمها مرض الخنازير"،حسبما ذكرت صحيفة "المصري اليوم".
سبق لشعبان أن قدم أغنيات شعبية ضد إسرائيل، وعن حال الأمة العربية وقضية دارفور والإرهاب وحوادث السكة الحديد واحتلال العراق كما قدم إعلانات توعية من أنفلونزا الطيور بمشاركة الفنانة انتصار.
والاغنية تقول كلماتها:
كوارثنا زادت كارثة
والوضع شكله خطير
قال يعنى كانت ناقصة أنفلونزا الخنازير
مرض خطير على البشر وبقولك وبوعيك
فى دولتين انتشر.. أمريكا والمكسيك
الأنفلونزا كترت وبقى مرض خطير
مبقتش طيور وبس.. بقت كمان خنازير
لو شفت يوم خنزيرة ولو شفت يوم خنزير
لازم تلحق وبسرعة تاخد بعضك وتطير
إيييييييه........
خنازير وطيور ولسه.. الناس جالها اكتئاب
قادر ربنا يسترها.. ع القطط والكلاب
بقول وبأعلى صرخة .. إحنا مش ناقصين سكوت
علشان خنزير وفرخة.. حرام الناس تموت
قفلنا كتير مزارع وعدمنا طيور كتير
عايزين قرار سيادى ونعدم الخنازير
ليه الخنازير تعيش ونضحى بناس كتير
تعيش الناس سليمة وطظ فى الخنازير
يا ريتهم يعدموها والناس فى أمان تبات
من غير ما الأمن يدخل ولا تحصل إضرابات