"إبتديت أحس بالموت أوي مش عارف ليه "!

تواصلا مع قرائنا الأعزاء، وتفاعلا منهم معنا ، ترحب "محيط الديني" بنشر مشاركتكم وأرائكم الدينية تعزيزا للتعاون والتفاعل بين الشبكة وقرائها الأعزاء.
وتنشر "محيط" مشاركة الطالب الجامعي حسن شعبان، والتي تحدث فيها عن الموت بأسلوب واقعي وموضوعي يحسب له.
يقول حسن :
"إبتديت أحس بالموت أوي مش عارف ليه يمكن عشان صوت المؤذن في المسجد اللي جنبي كل فترة ينعى بصوت عالي وفاة حد ونروح نصلي عليه واتخيل نفسي مكانه نايم ساكت ساكن !! ولا يمكن عشان قريت عن ان الموت قريب اوي من الانسان وان فيه خلاية موجودة في الجسم بتموت كل يوم وكل ساعة وكل دقيقة وكل ثانية وده زي مؤشر او دليل على ان الموت ممكن ييجي في اي لحظة !!
ولا عشان انا نويت اعيش لوحدي وسبت أهلي فده من تأثير الغربة والوحدة !!
ولا عشان الملل والرتابة وضيق سبل المعرفة وسبل الحياة كلها !!
هو مش موضوع كآبة ولا قلة تدين وايمان ولا قلة جهد وحركة ممكن تخليني أحس بكده .. هي فكرة اني لما بسأل نفسي أنا عملت إيه ممكن يكون هو اللي هيعيش بإسمي لو أنا مت مش بلاقي حاجة خالص
طبعا لسا متجوزتش ولا خلفت اللي هيعيش بإسمي .. محررتش أرض ولا أنقذت روح .. مبنتش بيت ولا بنيت اي حاجة ليها نفع .. معنديش علم أورثه لاني لسا في مرحلة القراية والبحث .. التاريخ نفسه مش هيقول عني حاجة غير اني كنت عايش مع العايشين في الفترة اللي ما بين ميلادي ووفاتي .. طب الحل ايه ؟؟
اللي أقدر أعمله دلوقتي هو اني أزرع شجرة أو حتى وردة صغيرة ومتهيألي دي حاجة شريفة يمكن لو أنا مت اللي هيبصلها هيقول دي شجرة اللي زرعها حسن ..
انا عايز أقول لصحابي اللي في سني واللي أكبر مني كمان ان زي ما انتو مؤمنين بالموت ومش عارفين هيجيلكو امتى لازم تسألو نفسكو نفس السؤال انتو ايه اللي عملتوه ؟؟ يا ريت اللي يقدر يتجوز ينوي بسرعة .. واللي يقدر يدافع عن أرضه ميبخلش عليها بحاجة واللي يقدر ينقذ روح من الموت ميترددش واللي يتعلم حاجة يعرفها لغيره واللي لاقي نفسه لسا معملش حاجة من كل ده يبتدي يزرع شجرة باسمه ..

**
ارسل مشاركتك عن أي موضوع ديني علي الايميل التالي :
aymoheet2012@gmail.com