«عروستى» و«الخاطبة» فوازير رمضان بنكهة جاهينية خالصة

طالما أمتعنا الراحل العملاق صلاح جاهين بفوازير رمضان بنكهته الجاهينية الخالصة ، ليقدم للتلفزيون فوازير " لغز الملكة شهر زاد " , و " عروستى " و " الخاطبة " .
و لكن لسوء الحظ ضاعت فوازير " لغز الملكة شهرزاد " التى قدمها جاهين للتلفزيون عام 1970 ، من بطولة عبد المنعم مدبولى ، و منى قطان ، ثم عاد و كتب لنيللى فوازير " عروستى " عام 1979 " ،و " الخاطبة " عام 1980 ، و لا يزال أرشيف التلفزيون يحتفظ بحلقاتهم كاملة .
كما قدم جاهين فوازير إذاعية من خلال البرنامج العام لسنوات عديدة ، بصوت الإعلامية آمال فهمى ، و ذلك منذ وفاة الشاعر بيرم التونسى الذى كان يكتب الفوازير لآمال فهمى حتى مماته فى منتصف الخمسينات ، و ضاع الكثير من إرث فوازير جاهين الإذاعية ، لكن بقى منها أعمال أربع سنوات .
و نستعيد مع جاهين فوازيره التى طالما أضفت على رمضان جو من البهجة يتجمع حولها كل أفراد الأسرة ، و ننشر لكم الحلقة الأولى من فوازير " عروستى " :
نيللى : الدنيا رمضان و هى
م الطاقه ترمى التحيه
الكل ينظر و يهمس
أعوذ م الفتنه ديه
شويه و الشمس تغطس
م الضحك تبقى ح تفطس
كركر .. و بعد ما تخلص
من تانى نرجع نديه
(مسجد مزين بالكهارب )
نيللى و المجموعة : يا منبع النور يا مداوى
نيللى : وطين بلادك قمحاوى
يا ايدين تملس و تساوى
سلامات سلامات
المجموعة : سلامات سلامات
لما قابلنى و قاللى سلامات
ولدى يا ولدى
سلامات سلامات
( يدخل يحيى الفخرانى و يمد كفيه على قرص من الخشب يدور و فوقه نيللى )
نيللى : تسلم ايديك يا فخرانى
و كمان رجليك يا فخرانى
يا اللى انت فنك ربانى
سلامات سلامات
( الفخرانى يخجل و يغطى نصف وجهه بيده )
متقال يعزف على الربابة
متقال : الحلوه بعد سبع لفات
يخرطها خراط الستات
( نيللى تدخل فى حلقة اللهب )
نيللى : على الفرن تدخل لك بثبات
سلامات سلامات
المجموعة فى رقص صعيدى : سلامات سلامات
لما قابلنى و قاللى سلامات
ولدى يا ولدى
سلامات سلامات
نيللى : نزلت بحر النيل
و سافرت ليل و نهار
و الرحلة كت سهلة
عشان مع التيار
قالوا ف محطه ايه
ح تنزلى يا ختى
انا قلت اى مكان
دى قسمتى و بختى
( دق طبول )
نيللى : الحندا بندا ويشى بم
الحندا بندا ويشى بم
العال يا حندا بندا
العال يا ويشى بم
( تظهر أربع فتيات يرتدين فساتين بلدى )
الأولى : ادينى حندا
نيللى : خدى حندا
الثانية : ادينى بندا
نيللى : خدى بندا
الثالثة : ادينى ويشى
نيللى : خدى ويشى
الرابعة : ادينى بم
نيللى : خدى بم
( ولد شقى يصوب بالنبلة و يصيب ما أخذته الفتاة الرابعة و تبكى و تقترب منها نيللى و تعطيها شيئا )
نيللى : انا عندى الدوا هنا بلوشى
و عيونك دولا ميبكوشى
بكره فى صانيتك تشوفيها
مجليه .. تقول فين طربوشى
( أولاد و بنات يدورون فى دائرة )
نيللى : طربوشى نحاس
المجموعة : ياللى
نيللى : أصفر لميع
المجموعة : ياللى
نيللى : فوق منه هلال
المجموعة : ياللى
نيللى : له شكل بديع
المجموعة : ياللى
نيللى : و اما ازهق منه
المجموعة : ياللى
نييلى : اقلعه و ارميه
المجموعة : ياللى
نييلى : واجيب بداله
المجموعة : ياللى
نيللى : فل و نعانيع
المجموعة : ياللى
( نيللى فى ركن المشربية بالطرحة )
نيللى : ما قل و دل .ز عرفتوا الحل ؟
المجموعة : لسه شوية
نيللى : يا وقعتنا .. فين شطارتنا
الحل فريجيدير اللاوى
تفانيهم جنبها ما تساوى
خفه معطره .. زى السكره
ياما قالوا عليها فى غناوى
( موكب السبوع و غربال فيه مولود )
الكورال : برجالاتك .. حلقاتك
حلقه دهب فى وداناتك
العوالم : وسط السبوع يا سلام سلم
الحلوة حسنها يتكلم
نيللى : و نقول روحولى
حكيم هاتولى
من كتر الفولى
اكمنه ناشف بتألم
الجميع : برجالاتك حلقاتك
( الكاميرا تستقر على الطفل )
نيللى : زجزاج طالع و نازل
على رقبتها منقوش
نرميها ورا العوازل
يروحوا ميرجعوش
الكورال : حزر فزر حزر فزر
نيللى : حزروا فزروا