ننشر نص تسريبات «الصندوق الأسود» المنسوبة للبرادعي مع الاستخبارات الأمريكية

عرض الإعلامي عبد الرحيم علي، الخبير في الحركات الإسلامية، عبر حلقته من برنامج "الصندوق الأسود" المذاع على فضائية "القاهرة والناس"، مساء اليوم الثلاثاء تسريبات باللغة الإنجليزية خاصة بمحادثة هاتفية جمعت بين الدكتور محمد البرادعي نائب رئيس الجمهورية السابق، ومسئول في وكالة الاستخبارات الأمريكية "سي آي إيه" يدعى دان برامن.
وتضمنت التسريبات التي كانت مدتها 16 دقيقة حديث البرادعي وبرامن عن تقسيم المنطقة وتحديدا مصر، بحسب التسريبات.
وكانت ترجمة نص المكالمة:
دان: هالو
علي : هالو
دان : اهلا محمد
علي: لا علي
دان: انا دان برامن
علي : انتظر من فضلك
دان: اوكي
البرادعي : اهلا
دان .. ازيك
دان : كويس انا لسه راجع من مهمة في الشرق الاوسط
البرادعي : اه انا عارف ، وافتكر ان الموضوع عدى بشكل كويس، مش عارف انت خدت بالك ولا لا، كان المجلس العسكري دعاني .. رئيس المجلس ورئيس الأركان يعني دعوني من كام يوم انا وساويرس اللي هو الملياردير المعروف، وعمرو موسى مشهور طبعا انت عارفه، والكلام كان كويس، واليومين اللي فاتوا دول كنت على اتصال مع رئيس الوزرا، هما عايزين يرجعوا البلد مرة تانية لوضعها الطبيعي وكلامهم كله انهم عاوزين يوقفوا الاعتصامات والمظاهرات، ولما اتكلمنا مع المجلس العسكري قلت لعنان رئيس الأركان الوضع عشان يرجع طبيعي لازم رئيس الوزرا يمشي، والصراحة هما عملوا كده ومشوه الصبح، ودلوقتي انا باحاول اتأكد ان الدنيا هتكون تمام بكره ومش هيكون فيه مظاهرات علشان نبدأ نتحرك في الفترة اللي جاية في تشكيل جمعية تأسيسية ونحط دستور جديد وبعدين انتخابات الرئاسة، وهكذا... يعني احنا شغالين عشان المرحلة اللي جاية بس عالأقل دلوقتي بقي فيه جسر من التفاهم معاهم بنتحرك من خلاله.. والأمور ماشية كويس يعني .
دان : كويس ، كويس جدا ، انا لما رجعت اتكلمت مع بيل بيرنز وهو قاللي انك اتكلمت مع طنطاوي وواضح ان ده مستمر وانه مش اتصال لمرة واحدة، وانك دلوقتي فتحت قناة اتصال.
البرادعي: هو ده حقيقي ...دلوقتي انا على اتصال جيد برئيس الأركان عنان وهو رقم 2 بعد وزير الدفاع، وكان كلامي معاه في اليومين اللي فاتوا حوالين التفاوض .. يعني كنت بقوله ايه اللي الشباب عاوزه عشان يوقف المظاهرات والاحتجاجات ويطمن للمسار الجاي، وبلغتهم ان السقف الأدنى للمطالب هو عزل أحمد شفيق، وده حصل بالفعل انهارده الصبح، ودلوقتي انا على اتصال بكل الناس الشباب والاخوان وكل الناس ، عشان اتأكد ان بكره هيعدي كويس ومش هيكون فيه احتجاجات تاني، وانا قلت لعنان اننا هنكمل الحوار بعد كده وافتكر ان الخطوة الجاية هتكون اننا نشتغل معاهم عشان نوصل لانتقال هادى للسلطة من خلال دستور جديد وانتخابات رئاسية ، وبعدين نبقي نعمل برلمان، عشان الانتخابات البرلمانية دلوقتي - زي ما قلت لبيرنز برضه مش هتفيد غير الاخوان والحزب الوطني، واتمنى اننا نقدر ناخد الوضع في اتجاه كويس خلال الست شهور اللي جايين.
دان : كويس .. كويس تفتكر الانتخابات الرئاسية ممكن تتم امتى.
البرادعي: افتكر اننا في الاول لازم نعمل لجنة تأسيسية عشان تكتب دستور جديد، لأن دستور 71 مليان مواد استبدادية من أيام النظام القديم، وده اللي انا هقوله ليهم في اجتماعاتنا الجاية، افتكر في خلال ست شهور ممكن يكون عندنا دستور جديد ونستفتي عليه، وبعدها نبدأ اجراءات الانتخابات الرئاسية، ولازم يكون فيها ضمانات للتصويت الحر والرقابة والشفافية، وحقوق المصريين في الخارج، كل دي حاجات محتاجة تتظبط والجيش مش عايز يقعد أكتر من ست شهور، هما فعلا عاوزين كده، ومتنساش ان فيه عندهم أزمة اقتصادية، وفيه حاجة مهم انك تعرفها، هما مرعوبين من قلة الفلوس ومن فكرة انهم محتاجين كل شهر 10 مليارات دولار لدفع الرواتب بس، وكمان مشكلة الأمن، الشرطة انسحبت والحالة الأمنية سيئة ... الحاجتين دول هما اللي بيفكر فيهم طنطاوي، والقضية الأساسية هي ازاي يجيبوا فلوس، وهما بيحاولوا يتصرفوا من الخليج ،لكن نتمني انا وساويرس والناس العاقلين هنا، نتمنى انهم يتجهوا ناحيتكم او ناحية اوروبا، وبالنسبة للأمن فهما عاوزينه يرجع عشان البلد ترجع لوضعها الطبيعي، لكن ده مش هيكون.
مقبول من المحتجين طبعا، لو احنا قدرنا نرجع للبلد جزء من شكل الحياة الطبيعي، يعني الجيش يحمي القانون والنظام في الشارع والسينمات تتفتح والمدارس ترجع تشتغل افتكر لو عملنا كده هنبقى ماشيين في الاتجاه الصحيح، هما عايزين يمشوا ويسيبوا كورة النار من ايديهم ويرموها لأي حد في خلال ست شهور، لكن طبعا الوضع معقد جدا واحنا لسه هنشوف شكل الست شهور الجايين هيكون ايه، واتمنى انهم يقبلوا اقتراحاتنا حوالين نقل السلطة ، وزي ما قلتلك قبل كده، احنا بدأنا الحوار .. وده في حد ذاته كويس.
يذكر أن الدكتور محمد البراداعي كان قد تقلد منصب نائب رئيس الجمهورية المؤقت المستشار عدلي منصور عقب ثورة 30 يونيو، قبل أن يتقدم باستقالته عقب فض اعتصامي رابعة العدوية والنهضة، وغادر القاهرة متوجها إلى فيينا ولم يعد إلى القاهرة حتى الآن.