ساووا الصفوف

ربى
الدنيا
بقت ليل
وكل ضباب
وراه ضباب
افتح بابك يارب
ارواحنا بتدق على الابواب
ساوا الصفوف
ساوا الصفوف
الله اكبر
تلاتين سنة غربة واغتراب
تلاتين سنة خوف
بيييييييييييير من الظلام عايشين فيه
التوهان ضاع فى الشوف
الفجر
قتل الخجل والكسوف
تاهت العيون فى الضلمة
وعيون ماعدتش تشوف
تلاتين سنة
حاكمنا خروف
سمع الله لمن حمده
الله اكبر

وكل انتقام
وراة انتقام
اقسم بيك
كوابسهم قتلت الاحلام
الخير بيضرب للشر
مليون تعظيم سلام
والصمت
الصمت قتل الكلام
بحر الحزن
على وشوش الاطفال عام
اللى هرب للكنيسة
واللى هرب للبار
واللى هرب للجامع
واللى طار على المقام
والنظام اللى ورا النظام
ساحب اعمارنا
وداخل بيها بحور الظلام
تلاتين سنة
والليل راكب على نفس النهار
الليل على وش النهار نام
سمع الله لمن حمدة
الله اكبر
وفجاة
فجاة يارب فجاة
يوم خمسة وعشرين يناير
يوم خمسة وعشرين
خرجت الناس من البيوت
زى النمل بالملايين
ملاين ساحبة الملايين
الليل الجبان خد السواد والغيوم
ومش عارف يهرب بيهم فين
الجنين فى بطن امه
ماسك فى ايد الجنين
الشعب يريد اسقاط النظام
زلزلت السماوات
بترج الارض والارض
بتهز العمارات
الاطفال هما اللى ساحبين الامهات
الشعب يريد اسقاط النظام
وفجاة
اتعمت عيون الرشاشات
الرصاص
بيكنس فى الناس
والناس
اموات بيجروا على اموات
الدم
مغرق الشوارع
والشعب
ساحب الشعب وطالع
حطموا كل الموانع
النهار حلف على الليل ماهو طالع
والدنيا
الدنيا بقت نهار فى نهار
الارض
الارض خلفت ملاين الثوار
بدون ولاطلق
الارواح بقت طالعة من الاجسام
عايمة على الانوار
روح مسيحية بتطبطب على روح مسلمة
وتقول لها امال يا اختى اجسمنا راحت فين
آلاف الاجسام متشوهين
ذئاب يارب ذئاب
حاكمين بنى ادمين
ارحمنا يارب العالمين
سمع الله لمن حمدة
الله اكبر
اليل المهزوم المكسور
اللى اتقطع تحت رجول الثوار
صعبان علية الانتصار
شاف النهاربيريح ساعتين
هرب من ورا ضهر النهار
فرش على وش الدنيا
غرق عيون الثوار
الليل الجبان
كل شوية يحط على عنينا سور
وبقينا عايشين خلف الاسوار
واختفت الثورة ياربى
واختفى معاها النهار
بقى بين الصمت والكلام
اسرار
القط اللى هو القط
بقى واقف قدام الفار محتار
الليل الجبار يارب
بقى جبار
بيطلع النهار بقرار
ويخفية بقرار
الدنيا وقفت على رجليها
بين الليل والنهار
محتاجين منك ياربى
شوية ثوار
يشيلوا الليل بضبابة
ويدفنوة فى قلب النهار
وحياتنا الميتة تموت
ويتولد منها حياة
السلام عليكم ورحمة الله ...... السلام عليم ورحمة الله