"عاوزين ترجعونا تاني؟".. تعليق ناري من شوبير لجماهير الأهلي: المدرج مش ملك حد

وجه الإعلامي أحمد شوبير، نجم الأهلي السابق، تعليق قوي على أحداث مباراة الأهلي والجونة أمس، واشتباك بعض الجماهير أثناء المباراة.
قال أحمد شوبير في برنامجه الإذاعي: "في العادة أنا مؤيد بشدة لزيادة الجماهير في المدرجات، وامبارح شفت منظر حلو جماهير كتير من القاهرة زحفت ورا الفريق، ده غير الجماهير اللي هناك في الجونة".
أضاف: "كنت قاعد بتفرج بس مش عارف القصة إيه بظبط بس حاسس بحاجه بتحصل، وفعلا زي منا قولت جمهور الأهلي بيتخانق مع جمهور الأهلي، ودي حاجة غريبة".
أوضح: "جمهور الأهلي العادي راح يقعد في الثالثة شمال، الأولتراس رفض وقال ده مكنا إحنا، والتانيين قالوا هنقعد فين مهو ده المدرج المخصص للأهلي، وحصلت خناقة بقى، وأنا بقول المدرج مش ملك لحد".
أكمل: "لازم اقول انتو عاوزين ترجعونا تاني ونخش في مشاكل؟.. ده ماصدقنا الجمهور رجع، وبنطالب بزيادة العدد، وانت سايب الماتش وعمال تتخانق راح الجونة تعادل وفريقك اتأثر، اتمنى عدم تكرار هذا الأمر مرة أخرى".
جدير بالذكر أن الفريق الأول للنادي الأهلي تعادل أمس مع الجونة بهدف لكل فريق، خلال المباراة التي أقيمت بينهما على ملعب خيري بشارة، والمؤجلة من الجولة الرابعة لبطولة الدوري المصري الممتاز.