السيسي: قوة جيشنا للدفاع عن بلدنا "اوعى أوهام القوة تدفعك للتجاوز"

وجه الرئيس عبدالفتاح السيسي، التحية للقوات المسلحة، لدورها وقت الحرب والسلم، وبمناسبة مرور 50 عاما على نصر أكتوبر العظيم.
وقال السيسي: أنا بسجل هنا إن هذا التزام كان ضمن احتفال مرور 50 عاما على نصر أكتوبر، وعشان الظروف خلينا الالتزامات في أقل ما يمكن، مراعاة لظروف المنطقة
عايز أقولكم على حاجة، أكتوبر بالنسبة لنا له معنى كبير أوي عشان كان عبور من حالة يأس إلى أمل، ومن إحباط إلى فخر، ومن هزيمة إلى نصر، وبالتالي في كل سنة نتذكر الجهد والتضحية اللي قدمتها مصر والقوات المسلحة من أجل تحقيق هذا.
وأضاف على هامش تفتيش حرب الفرقة الرابعة مدرعة بالسويس: النهاردة بعد 50 عاما، مهم أوي نستخلص الدروس والعبر ونستمر في ذلك، النهاردة الحديث عن الأمن القومي والحفاظ عليه، وده دور أصيل ورئيسي للقوات المسلحة، وهو حماية الحدود المصرية وتأمين الامن القومي ومصالح مصر، مصر أبدا عبر تاريخها مكنتش أبدا تتجاوز حدودها، دائما كل أهدافها تحافظ على ترابها وأرضها، وده معناه إن الجيش بقوته ومكانته وكفاءته، هدفه حماية مصر وأمنها القومي دون تجاوز
وتابع الرئيس: في ظل ظروف المنطقة اللي موجودة دلوقتي، كلامي هنا لينا كلنا للعسكريين والمدنيين، مهم أوي وانت بتمتلك قوة وقدرة، إنك انت تكون بتستخدمها بتعقل ورشد وحكمة، ولا تطغي، ميبقاش عندك أوهام بقوتك، ساعات أسمع كلام، يقولك ما دام عندنا يعني.. لأ، عندك عشان تدافع عن نفسك وبلدك، اوعى الغضب والحماسة تخليك تفكر أبدا بشكل تتجاوز فيه، وتقول في وقت من الأوقات مكنش ممكن أوي ومكنش لا بد تتجاوز كده.