نجل محمد ثروت يعلن تماثله للشفاء بعد رحلة علاج استمرت 160 يوما

أعلن أحمد ثروت نجل الفنان محمد ثروت عن شفاءه واستجابته للعلاج بعد مرور 160 يوما منذ إصابته بمرض نادر في الجهاز العصبي (متلازمة الميلر فيشر)، التي اضطر بسببها للسفر الى ألمانيا لاستكمال رحلة علاجه هناك.
ونشر نجل محمد ثروت، فيديو، عبر حسابه على إنستجرام، وعلق: "الحمد لله كرم من ربنا وبفضل دعواتكم النهاردة بعد 160 يوم صراع مع متلازمة ميلر فيشر، أول يوم انجح اني اقف تاني علي رجلي بعد عشارت الاسابيع ومئات المحاولات".
وتابع: "اتعلمت كتير من اختبار ربنا ليا، اتعلمت الرضا والحمد علي كل حال وان ستر ربنا علينا فوق كل شيء ومدي تحملك بيجي معاه كرمه ليك فالاخر وانه مش هيخذلك طول مانت مسلم امرك وان عادي ممكن ابتدي تاني كل حاجة من الاول وان لسه في امل طول ما في حياة".
واستكمل: "ربنا الهمني في اول الاصابة اني اوثق الاختبار دة من اول يوم حتي الان، ودة عشان اول ما اقوم ان شاء الله اتمني اكون سبب ف التوعيه لمثل هذه الامراض النادرة وازاي لو لقدر الله اتصابت انت بيها او حد قريب منك تتعامل معاه ازاي لأن جزء كبير من التعافي هو الحالة النفسية للمصاب".
وتابع: "حابب اقول حاجة من قلبي بجد، الكرم الي ربنا كرمني بيه دة نور لي حاجات كتيرة، خلاني اقعد مع نفسي اقيمها وعرفني قيمة نعمة نعمة هو مديهالي زي اني ادخل الحمام لوحدي او اعرف اكل لوحدي او امشي خطوة او حتي اتحكم ف جسمي والي معظم الناس ماتعرفوش اني كنت فقدت بصري لاسابيع ف عيني اليسري وفقدت القدرة علي التحكم فالكلام لاكثر من شهر".
وأردف: "وكل يوم كنت بسأل نفسي وانا في ظروف دي لو ربنا افتكرني هو انا قدمت ايه لكل الي حواليا؟!...و وصلت دلوقتي ان بقي عندي هدف اكبر من اني انجح او اشتغل لنفسي بس، خلي عندي احساس بحاجات قيمتها لما دخلت فيها وحسيت بيها زي مثلاً واحد جالة المرض الي صابني ومش عارف وفاكر ان عنده مرض تاني وتوفي عشان عنصر الوقت لم يسعفه او مريض تاني عرف التشخيص ومعهوش فلوس العلاج نظراً ان العلاج بتاع الامراض المناعية زي حقن الاجسام المضادة غالية جداً".
وأضاف: "إن شاء الله قريباً جداً هقول عن حاجة شغال عليها هتخفف المعاناه عن اي حد محتاج مسانده او مساعده ويارب ربني يقدرني وماشوفش حد يدخل ف اختبار زي الي انا مريت بيه..أخيرا حابب اشكر كل واحد دعالي من قلبه وكل صحابي واهلي الي كان حبهم ليا من اسباب اني اقف تاني علي رجلي بعد ستر و توفيق ربنا،ودعواتكم ليا لإتمام الشفاء علي خير ويارب يكون ربنا جعل مني بعد اختباره دة انسان افضل".
View this post on Instagram
A post shared by Ahmed Sarwat (@ahmedsarwat)