تكريم روجينا وأبطال مسلسل"ستهم" بمركز جيل المستقبل بمحافظة سوهاج (صور)

كرم مركز جيل المستقبل للثقافة والفنون بمدينة "سوهاج الجديدة"، أبطال مسلسل "ستهم" الذي عرض خلال شهر رمضان الماضي 2023.
وبحضور الدكتور أشرف زكي نقيب المهن التمثيلية، تم تكريم عددا من أبطال المسلسل وهم روجينا والشيخ ياسين التهامي وغادة طلعت وسلوى عثمان والمخرج رؤوف عبد العزيز والمؤلف ناصر عبد الرحمن.
وشهدت احتفالية التكريم، تقديم عرض مسرحي لعدد من الأطفال الذين قاموا بتمثيل عددا من المشاهد الخاصة بمسلسل "ستهم" في وجود صناع المسلسل وأبطاله.
وقالت النجمة روجينا، خلال كلمتها بالاحتفالية: "أنا اتكرمت في دول كتير واتكرمت في مصر واتكرمت على ستهم، بس التكريم ده بالنسبالي مفاجأة ومختلف عشان لما تعملي عمل وتلاقي أطفال بيحتفلوا بعملك في مشروع تخرجهم وبيمثلوا المشاهد اللي إنتي بتعمليها وكانوا بارعين وهايلين وأثروا فيا وبشكر البنت اللي عامله دوري مذاكرة ستهم ومواهب صغيرة بس مؤثرة ما شاء الله عليهم هيبقوا فنانين عظام لما يكبروا".
وتابعت روجينا: "حسيت احساس غريب أوي أول مرة أحسه.. انتي ساعات تعملي عمل يسعد الناس إنما إنك تأثري في الناس بالشكل ده لدرجة إن هما يمثلوه زي ما إنتي كنتي بتمثليه ده كان بالنسبالي جديد ومختلف ورائع إن المسلسل أثر في الصعيد وأثر فيهم".
وأوضحت بطلة "ستهم": "زمان وأنا في المعهد كنت بمثل الحاجات العالمية كده بتاعت شكسبير ونجيب سرور، وإن أنا روجينا يكونوا حافظين دوري وبيمثلوه ومأثر فيهم بالشكل ده دي حاجة تسعدني".
وأضافت: "أنا كنت مبسوطة إني جاية الصعيد أتكرم وكنت عارفة إنه هيكون احتفال مهم جدا بالنسبالنا، مخوفتش من جمهور الصعيد خالص عشان انتي عاملة شخصية صعيدية فانتي رايحة تحتفلي بمسلسل ستهم وسطهم، فكنت سعيدة بنجاح المسلسل وإن هم متفرجين على المسلسل ومذاكرينه وحافظينه".
وحقق مسلسل "ستهم" نجاحا جماهيريا كبيرا عقب عرضه في موسم دراما رمضان 2023 .
مسلسل"ستهم" بطولة روجينا، وإياد نصار، وجهاد سعد، ونانسي صلاح، وغادة طلعت، ومحمد عبد الحافظ، وبيومي فؤاد، وسلوى عثمان، ومن تأليف ناصر عبد الرحمن، واخراج رؤوف عبد العزيز.