"إحنا بنتهان".. عمرو أديب: "محدش يتكلم على المؤامرة والزمالك هيتساب لرحمة ربنا"

علق الإعلامي عمرو أديب، على هزيمة النادي الزمالك بالأمس من نادي البنك الأهلي بثلاثية نظيفة، وخروجه من بطولة كأس الرابطة، قائلًا: "ايه اخرتها، شوفوا اللي انتوا عايزينه لكن المشهد دا مينفعش، إحنا بنتهان وبنتغلب وإحنا فريق بقينا تريقة ومسخرة".
وقال "أديب" خلال تقديمه لبرنامجه "الحكاية" على فضائية "إم بي سي مصر 2" اليوم الاثنين: "عايز اسأل المبسوطين جوا الزمالك مبسوطين على ايه، في ايه يبسط في النادي، محدش يتكلم ويقول في مؤامرة إحنا المؤامرة وقلبها من جوا"، موضحًا: "الوضع من سيء لأسوأ كنا قبل كده من غير مجلس إدارة خالص وخدنا دوري وكأس وكان ممكن النادي يكمل، ومتفهمش في أيه بيحصل".
وتابع: "محتاجين حد يطلع يقولنا خطوات الإصلاح، مش عارفين موقف رئيس النادي، وشوفنا امبارح اللاعيبه خارجة من الملعب مكسورة نفسيًا وكل ماتش أسوأ من اللي قبله لا عارفين مدرب ولا حد يكلمه".
وأردف: "الدولة بتتفرج ومحسسانا يوم اه ويوم لا، مع أن النادي دا بتاع الدولة، والفلوس دي فلوس الدولة، لكن للأسف الزمالك هيتساب عزبة لرحمة ربنا ويجرى اللي يجرى فيه بس قولولنا يا جماعة"، موضحًا: "وزير الرياضة موقفه مش واضح بيقول هنشوف مش عايزين ندايق حد مش عايزين نعمل حاجه وتطلع غلط بعد كده طب هتعرف امتي".
وأكمل: "الزمالك عمره ما كان كده وعمرنا في أسوأ ظروفه ما كنا كده، مبقاش في حاجه غير خناقات قاعدين في نادي خناقات مجلس إدارة ورئيس نادي ومؤامرات والدولة والمعركة الأسطورية مع الخطيب طب وبعدين".
واختتم: "أنا لا عضو ولا مرشح نفسي ولا واقف جنب حد في الانتخابات ولو الموضوع مفيهوش حاجه بتفرج على الدوريات الأوروبية والكرة الحلوة، لكن اللي بيحصل في الزمالك شيء مهين وبايخ وشكله وحش، وفوق كل دا تلقى ناس بتقول الدولة واقفة جنب الزمالك كمان أمال لو قاعدة تبقى عامله ازاي"، مضيفًا: "ربنا يتولى الزمالك برحمته ونقرأ عليه الفاتحة كده أو نلاقي إصلاحات بخطوات معروفة وواضحة نركز في النادي، والسنة دي أسوأ سنة ومفيش أسوأ من كده النادي مش واقف على رجله".