السيسي خلال احتفالية الأمهات المثاليات: الأم اللي شايلة ومستحملة الأزمات والأيام الصعبة

كتب- محمد عمارة وأحمد السعداوي:
قال الرئيس عبد الفتاح السيسي إن المرأة المصرية كانت في 2013 لها دور كبير جدًّا في حماية مصر.
وأضاف الرئيس السيسي، خلال احتفالية تكريم الأمهات المثاليات اليوم الإثنين: افتكروا، ووالله لما بافكركم مش بافكر نفسي.. أنا فاكر؛ لكن باسجل هنا في اليوم ده.
وتابع السيسي: في 30 يونيو اللي كانت متصدرة الموضوع كانت الست، ولما طلبت الناس تنزل، قلت الناس تنزل تديني تفويض، اللي نزل في رمضان، الست هي اللي قامت ونزلت والدنيا شافت، ولما الدنيا قامت، العالم قال ده مش الجيش، ده البلد رافضة اللي بيحصل.
واستطرد رئيس الجمهورية: آه الأب موجود؛ لكن بحنية الأم اللي سهرت وربت وشالت 9 شهور وبقى شاب، وبعدين قدمته لمصر.. طب ما هو ده أصعب إن الأم بعد كل ده تقدم ابنها ويستشهد أو يتصاب وهو مَلو العين، زي ما بيقولوا، وييجي الخبر، وحتى الأزمات اللي بتمر علينا والأيام صعبة.
وقال الرئيس: أنا باعترف بده مش عشان أطيب الخواطر؛ لأ احنا واحد، مين بيقوم بالدور ده وشايلة الشيلة، هي الست، لما نبص للأمور على بعضها، النبي محمد قال أمك ثم أمك ثم أمك، وكان من إنصاف النبي اللي علمهولنا، حملته أمه وهنًا على وهن.. مين يقدر يشيل شيلة 9 شهور ويمشي بها، ماحدش غير الست، كل سنة وأنتم طيبين، ودايمًا في أمان ومصر دايمًا في أمان وسلام.