"قالي أنت أحد أسباب نجاحي".. هاني شنودة يكشف كواليس لقائه بالفنان العالمي رامي يوسف (خاص)

كشف الموسيقار هاني شنودة كواليس لقائه بالفنان العالمي رامي يوسف في ستديو "المصريين"، أمس.
وقال هاني شنودة في تصريحات خاصة ل "مصراوي": "أول حاجة أنا بشكره لمجيئه إلى مصر، قالي أنا كنت لازم أعرف الشخص اللي كان أحد أسباب نجاحي وجها لوجه، فأنا جيت مخصوص مصر يا هاني عشان أقابلك، لإن الموسيقى بتاعتك هي اللي نجحت المسلسل".
وتابع: "فأنا قولتله ده شرف لا أدعيه، قالي، لأ، دي بتتلعب في كل الديسكوهات في أمريكا وبيرقصوا عليها، اللي هي لونجا 79، قولتله مبقاش اسمها لونجا 79، بقى اسمها لونجا رامي يوسف، فضحك، قولتله أنا أعلنت ده في حفلة الجامعة الأمريكية والناس صقفت لإنك محبوب عند الناس كلها".
وأضاف: "قولتله لإن المسلسل بتاعك عبارة عن بني آدم مصري راح أمريكا محافظ على تقاليده وعادات وقيمه مش داب في المجتمع الأمريكي، ده بيعلمهم الحاجات الحلوة اللي عندنا، وبعدها أكلنا وهزرنا، وقولتله هنأ والدك ووالدتك لإنهم علموا بني آدم زيك كده لطيف ومتواضع وحاجة تجنن، قالي استنى هجيبهم على التليفون، وسلمت عليهم وهنأتهم بنجاحه، قولتلهم مصر كلها بتهنيكم، مش أنا لوحدي".
يذكر الفنان رامي يوسف من أصول مصرية، حصل على جائزة "جولدن جلوب" كأفضل ممثل عن دوره في المسلسل الكوميدي "Ramy"، وعزف في الحفل موسيقى برنامج "الكاميرا في الملعب".
المقطوعة الموسيقية تأليف الموسيقار هاني شنودة واسمها "لونجا 79"، من ألبوم لفرقة "المصريين" طُرح عام 1979.
يذكر الموسيقار هاني شنوده أعلن استقبال الفنان الأمريكي رامي يوسف في ستديو المصريين، وذلك عبر صفحته الخاصة بموقع التغريدات "تويتر".
وكتب هاني شنودة: "أتشرف باستقبال الفنان رامي يوسف قريبا جدًا في مصر، باستديو المصريين بعد طلبه مقابلتي شخصيًا".
لونجا مع رامي pic.twitter.com/ysdnPyRzwq
— Hany Shenouda حسب خطوط الطول والعرض- هاني شنوده (@ShenoudaMusic) September 16, 2022