مفاجأة الاختيار 3.. حوار مرسي وطنطاوي والسيسي قبل نتيجة الانتخابات الرئاسية ب"الصوت والصورة"

شهدت الحلقة الثامنة من مسلسل "الاختيار 3"، عرض تسجيلا حقيقيا لجزء من حوار يجمع ما بين المرشح الرئاسي الإخواني محمد مرسي، والمشير محمد حسين طنطاوي، واللواء عبد الفتاح السيسي، بتاريخ 20 يونيو 2012، قبل إعلان نتيجة الانتخابات الرئاسية.
ويزور "مرسي" مقر المخابرات الحربية، ليلتقي مع المشير واللواء، ويؤكد المشير في بداية اللقاء أن "اللواء عبد الفتاح السيسي مش ابني.. ده حتة مني.. مش بس يؤتمن على الجيش ده يؤتمن على البلد كلها"، ويرد مرسي: "إحنا بنعتبر اللواء عبد الفتاح من الأسس اللي مع حضرتك والدراع الأساسية".
ويبدأ مرسي كلمته: "مباركلتيش يعني يا سيادة المشير؟"، فيرد المشير: "أباركلك على إيه؟ هي النتيجة طلعت؟"، فيرد اللواء السيسي: "إن شاء الله يوم الخميس يا فندم".
يكمل مرسي: "النتيجة متتغيرش لأن دي إذا حصلت ليس لها من دون الله كاشفة.. الموجة الموجودة موجة إضرام نيران، لمن لا يقدر المسئولية، أنا لا أتمنى هذا ولا أريده ولا أوافق عليه".
يرد المشير: "عايزك تاخد بالك من إن لو حصل وجهة ما حاولت أنها تضرم النار في البلد، دي هتبقى مصيبى على البلد وعلينا، عايزك تاخد بالك، وخليهم مفيش داعي للحاجات دي".
يعقب مرسي: "أنا بس عايز أقول لحضرتك أن التصرف اللي موجود والشعور اللي موجود، شعور تلقائي شعبي وليس مخطط له"، ينفي المشير: "لأ في تخطيط معلش".
يستكمل مرسي: "النقطة التانية هي انعقاد مجلس الشعب"، يرد المشير: "أنا مقدرش أعمل فيه حاجة، معلش أنا أصارحك القول، هل أنا أقدر أعمل حاجة دلوقتي في مجلس الشعب؟"، يرد مرسي: "أه حضرتك تقدر"، يسأل المشير: "أعمل إيه؟"، يرد مرسي: "تلغي القرار"، يرد المشير: "لا أنا مقدرش ألغي القرار"، يسأل مرسي: "ليه؟"، يرد المشير: "مع احترامي ليس من سلطتي إني أنا ألغي القرار"، يعقب مرسي: "لأ حضرتك اللي أصدرت القرار"، يرد المشير: "مش أنا اللي أصدرت القرار.. القرار ده قرار محكمة"، يعقب مرسي: "القرار التنفيذي"، يرد المشير: "لأ ده حكم محكمة.. التنفيذ ده حاجة والقرار حاجة.. معلش أنا برضو بصارحك".
يضيف مرسي: "استمع إليّ بس"، يرد المشير: "أنا استمعت إليك والله كتير جدا"، يعقب مرسي: "أنا أخوك الصغير"، يرد المشير: "الموضوع ده أنا غير قادر عليه"، يرد مرسي: "عشان متجبيش بس بعد يوم من الأيام بعد يومين تلاتة أربعة تقول إنه إحنا ضيعنا فرصة"، يعقب المشير: "أومال أعمل إيه؟ هو أنا هطلع قرار؟ ده أنا هلغي حكم محكمة.. أنا مقدرش أعمل كده معلش مع احترامي"، يرد مرسي: "حكم المحكمة هيطبق يا سيادة المشير، ولكن هيطبق بطريقة يتفق عليها في مرحلة لاحقة"، يسأل المشير: "يعني إيه؟"؛ يجيب مرسي: "أنا اقترحت اقتراح واضح، إحنا قدامنا منفذ اتنين تلاتة، المنفذ الأولاني أنه يتلغي القرار، ودي مسألة مش صعبة، الحاجة التانية أن الموضوع يحال إلى الفتوى والتشريع وياخد فيه بعض الوقت لغاية ما يقول رأيه"، يرد المشير: "يا محمد بيه أنا في اعتقادي.. مش أنا بس.. أنا لو جمعت دلوقتي المجلس وعرضت عليهم مفيش حد هيوافق على الكلام ده.. الموضوع ده مش متفق معاك معلش".
يتابع مرسي: "إذا استشعر الناس زي ما أنا بقول إنه سدت كل المنافذ"، يسأل المشير: "ناس مين؟"، يرد مرسي: "الشعب.. الناس اللي إحنا عايشين معاهم"، يرد المشير: "أنتوا برضو متاخدوش فئة من الشعب.. ما تشوفوا الشعب كله بيقول إيه"، يرد مرسي: "ما إحنا شايفين"، يعقب المشير: "اسمع كلامي.. لا معظم الشعب بيقول كلام تاني خالص".
يختتم مرسي: "النتيجة إذا تغيرت يا سيادة المشير"، يقاطعه المشير: "مين قال إنها هتتغير؟"، يكمل مرسي: "سيؤدي هذا أنا بقول لحضرتك إلى حالة من الاضطراب لا نعرف إلى أي مدى ستذهب.. تغيير النتيجة أنا بقول لحضرتك سيؤدي إلى اضطرابات، ساعتها لا أنا ولا أنتوا هتقدروا تمنعوها، ستتوجه الاضطرابات إلينا، ستمثل خطر حقيقي غير 11 فبراير، أنا أرصد الواقع لحضرتك، أنا لك ناصح أمين".
وكان المنتج تامر مرسي، قد أعلن عبر صفحته الرسمية على الفيس بوك، عن مفاجأة مدوية في حلقة اليوم من مسلسل الاختيار 3 قبل عرضها على قناة ON.
"الاخيتار 3" يضم عدد كبير من نجوم الفن من بينهم: ياسر جلال وأحمد السقا وكريم عبد العزيز وأحمد عز وصبري فواز وخالد الصاوي وغيرهم، من تأليف هاني سرحان وإخراج بيتر ميمي.