أجرى الرئيس عبد الفتاح السيسي، مداخلة مع الإعلامية عزة مصطفى مقدمة برنامج "صالة التحرير" عبر قناة "صدى البلد"، حرص خلالها على توجيه رسالة للضيف الكاتب والسيناريست عبد الرحيم كمال. وقال الرئيس مخاطبا عبد الرحيم كمال: "أنت شخصية رائعة تتحدث بشكل يعكس حجم من المعرفة ورقي الفكر والثقافة، وأقول لك: جهز اللي أنت عايزه وأنا معاك"، ورد السيناريست: "يا فندم ألف شكر، ودي ثقتنا في حضرتك ورؤيتك". وقال الرئيس مخاطبا السيناريست: "كان هناك دائما أولويات للدولة تجاه قضاياها، والإعلام والثقافة والفنون لها أولوية متقدمة، ولكن مش كل حاجة بنفكر فيها بنقدر نصل فيها للنتائج المرجوة، لكن أنا لفت نظري كلامك عن تجديد الخطاب الروحي بدل الخطاب الديني، وأن يبقى في حاجة بتتكلم عن التاريخ مع دمجه بفكرة معينة، أنا عايز أقولك أنا داعم لك في هذا العمل على مستوى الدولة". أضاف: "أنا عارف إن أي ناس بتشتغل في مهنة بتستهدف الربح وده أمر طبيعي، لكن أحيانا لما يبقى في قضية تستهدف طرحها على الناس قد يتوارى الربح شوية، أنا مش هطلب من المبدعين والمفكرين والمثقفين والكتاب والمنتجين والمخرجين أنهم يتناولوا قضايا قد لا تحقق أرباحا، مع تقديري أن أي عمل فني راقي هيقدر من خلال مهارات المشاركين به أن يدعو الناس تتفرج عليه، لكن إذا كانت التكلفة المادية والربح سيكون عائقا أمام عمل زي كده، فأنا بقولك قدام كل الناس أنا معاك". وعلّق عبد الرحيم كمال: "أنا بشكر حضرتك، هو ده عشمنا، ودي الرؤية اللي إحنا مستنيينها، وأنا حسيت بالفخر وثقتي في نفسي وبلدي زادت، وأنا مستعد أقدم العمل ده مجانا فعلا، لأنه مكسبي أكبر بكتير من أي أجر آخر، وعندنا مواهب كتير جدا والله يا فندم". وعلّق الرئيس: "إحنا مش بنطلب منك تعمل مجانا ولا حاجة، لأ طبعا ليه، لكن أنا بطلب منك إنك تعمل عمل تحشد فيه كل الموهبة والفهم في أسرع وقت ممكن لبناء الوعي الحقيقي.. وأنا أوجه لك التحية على فهمك ووعيك وثقافتك، وأنا أكررها لك أنا داعم لأي عمل فني في مجال بناء الوعي، وهمنا أن نحصن أولادنا ويبقوا فاهمين كويس أوي الدنيا حوالينا عاملة إزاي". وقال الرئيس السيسي، إن قضايا مصر كثيرة، وتناولها مهم للغاية في الأعمال الفنية، مضيفا: "لو في كتاب موهوبين زي حضرتك تصدوا لمعالجة قضايانا وكتبوا، فأنا بقول ستجدوا دعمي لهذا الإبداع ضخم جدا، وأنا مجهز لهذا الدعم كويس أوي، أنا داعم لأي عمل فني يهدف لبناء الوعي الحقيقي بما فيه الوعي الديني". وحول القضايا التي يتمنى الرئيس تقديمها دراميا؛ قال: "القضايا كتير الصراحة، لكن أهمها قضايا الفهم، فهم تحدي إسقاط الدول، الخطورة كلها في استهداف الدول، أنا أتصور أنا القضية الأهم هي قضية الوعي". وعلّق كمال: "شكرا يا فندم، سعادتي غامرة، شكرا على دعم الحرية والجمال والفن، ومجهود حضرتك عظيم وحقيقي وملموس بالعين". يذكر أن أخر أعمال عبد الرحيم كمال مسلسل "القاهرةكابول" في رمضان الماضي، بطولة فتحي عبدالوهاب وطارق لطفي وخالد الصاوي وحنان مطاوع ونبيل الحلفاوي وغيرهم، وهو من تأليف عبدالرحيم كمال، وإنتاج شركة سينرجي، وإخراج حسام علي.
