محمد هنيدي يكشف عن الورث الذي تركه له جده (فيديو)

روى النجم محمد هنيدي، ذكريات طفولته وشبابه التي قضاها في منطقة إمبابة، وذلك خلال حوار له مع الفنان أمير كرارة مقدم برنامج "سهرانين" عبر فضائية ON.
وقال هنيدي إن علاقته كانت خاصة للغاية بجده الراحل، خاصةً وأنه جاء للدنيا بعد أن رُزق والده بأربع فتيات.
أضاف: "جدي كانت قعدته لذيذة ويمكن أنا كنت أقرب حفيد له، كان ليّا معاملة خاصة في كل حاجة، الله يرحمه كان معايا حالة خاصة جدا، وخاصة أني كنت بعمله اللي هو عايزه، وأي خناقة مع أي حد في عيلتي مكنش حد يقدر يتكلم بسبب علاقتي بجدي".
تابع: "لما انتقل جدي لرحمة الله قالولي جدك سايبلك حاجة، فأنا فرحت أوي يعني وقولت سايبلي ورث أي أرض ولا حاجة، فالله يرحمه طلع سايبلي السديري والعصاية بتاعته كذكرى منه يعني، طبعا انفعلت وقتها وأنا نازل من البيت قمت راميهم على الأرض وقلت إيه الورث ده".
وحول أوجه الشبه بين جده في فيلمه الشهير "فول الصين العظيم" وجده الحقيقي؛ قال: "لا مفيش شبه وعلاقة مختلفة تماما، جدي كان طيب جدا وبيوجهني وبيعلمني الصح، لكن في فول الصين العظيم جدي كان عاوز يطلعني حرامي".