"بيخلِّي العيال يقولوا لي يا بنت".. والد طالب يكشف تفاصيل تعرض نجله للتنمر

قال فيض الله حسن، والد الطفل يوسف، ضحية التنمر من معلمه، إن نجله تلميذ في الصف الرابع الابتدائي بمدرسة عزبة خير الله بدار السلام التابعة لإدارة البساتين التعليمية، يتعرض للتنمر بصفة مستمرة من أحد المعلمين بالمدرسة يدعى "محمود" وآخر "إسماعيل"، متابعًا: "الاتنين دايمًا مضطهدين يوسف بطريقة وحشة، وبيتنمروا عليه".
وأضاف حسن، خلال مداخلة هاتفية مع برنامج "مساء dmc"، تقديم إيمان الحصري، المذاع عبر فضائية "dmc"، اليوم الأحد: "في أثناء الحصة، المُدرس بيقول الطفل اللى مش داخل مجموعة أو درس يحط وشّه في التختة، وفي آخر الحصة اطلع اقرأ على السبورة، اختاروا يوسف يطلع على السبورة هو ما عرفش يقرأ، المدرس قال له اختر لنفسك اسم بنت عشان صحابك ينادولك به".
وأوضح والد يوسف: "مرة واتنين حصل ده مع يوسف، وهوّ ما قالش، لكن فوجئت بزملاء يوسف يسألون عن سبب تغيبه عن المدرسة لمدة يومين، وكنت ما أعرفش أن ابني مش بيروح المدرسة، وتالت يوم مشيت وراه كي أعرف سبب إنه مش بيدخل المدرسة، فرأيته يقف أمام المدرسة حتى نهاية اليوم الدراسي، وقتها قُمت بعقابه وأوصلته في اليوم التالي للمدرسة، حتى جاء إليَّ في حالة انهيار شديد، وقعد يبوس رجلي ومش عايز يروح المدرسة، وسألته إيه اللي حصل، فحكى لي بطريقة مش مصدقها".
من جانبه، قال يوسف إنه لا يرغب في الذهاب إلى المدرسة، بسبب اضطهاد المدرس، مضيفًا: "المستر مستقصدني ومش بيحبني وأنا مش عارف ليه، وبيخلِّي العيال زمايلي يقولوا لي يا بنت.. ولما بيدخل الفصل بيقول لي حط دماغك على التختة.. أنا مش عايز أروح تاني المدرسة".
ودخل يوسف في نوبة بكاء، قائلًا: "المدرس بيعمل معايا كده أنا وأصحابي وبيخلي الولاد يقولوا لي يا بنت، والنبي يا بابا مش عايز أروح المدرسة تاني".
وأكدت يسرا علام، مستشار وزير التربية والتعليم للاتصال، أن الوزارة ستتابع الواقعة وسيتم التحقيق فيها، متابعة: "فيه إخصائي اجتماعي في المدرسة وهاعرف يوسف راح يتكلم معاه ولَّا لأ، هناخد للطفل حقه وهنتواصل مع مدير المديرية".
وأشارت علام إلى أن "التربية والتعليم" لا تقوم بتغيير المناهج فقط، لكن أهم حاجة إعادة بناء المواطن المصري أخلاقيًّا ثم علميًّا، وهذا هدف الدولة.