صدمة عمرو سعد التي لن ينساها واعتراف أحمد فهمي في "أمن الدولة".. 7 تصريحات لنجوم "الفن×أسبوع"

تتنافس البرامج التليفزيونية كل أسبوع على استضافة أشهر نجوم ونجمات الفن، للحديث عن أمور شخصية وفنية، تضمن الخروج بتصريحات جريئة، تحقق أعلى نسب مشاهدة.. وفي السطور التالية، يستعرض "مصراوي" أبرز 7 تصريحات لأهل الفن في البرامج الفنية خلال الأسبوع الماضي "عمرو سعد يكشف عن صدمة لن ينساها، رانيا يوسف تحكي تفاصيل أزمة الفستان الجريء، واعترافات أحمد فهمي في أمن الدولة، ..".
عمرو سعد
كشف الفنان عمرو سعد، في حلقة جديدة من برنامج "معكم"، الذي تقدمه الإعلامية منى الشاذلي على قناة CBC، عن صدمة لن ينساها، بسبب فيلم "الآخر" للمخرج يوسف شاهين.
وقال عمرو "قبل الفيلم كان فيه واحدة في حياتي وخلعت، كنت على قد حالي مفيش أمل، مفيش رجا فهتجوزني إزاي، وجالي الفيلم قلت بس يا كرمك يارب هتشوفني على الأفيش، وكان فيه حد غايظني وبيتنمر عليا فهيشوفني، وقعدت أفكر في الريد كاربت وعمال أفكر رد فعل الناس هيبقى إيه وأصحابي بقى، وبقول لهم في المنطقة وكله يجهز وبدأت اترسم وفي دماغي السوكسيه اللي بياخده الفنانين اللي اشتغلوا مع يوسف شاهين، ودوري في الآخر معظمه اتشال، معرفش عزموني على العرض الخاص ليه، اخدت صدمة مهولة".
رانيا يوسف
استضاف برنامج "الحكاية" الذي يقدمه الإعلامي عمرو أديب، على قناة MBC مصر، الفنانة رانيا يوسف بعد أزمة فستانها الجريء الذي ارتدته في حفل ختام مهرجان القاهرة السينمائي الدولي، وقالت رانيا "اخترت الفستان من مول في بلد عربي، ودخلت قيسته، وكان معايا أهلي وبناتي، وقالولي حلو أوي يا مامي، مستعملتوش قبل يوم المهرجان، لبسته يوم الحفل نزلت من العربية وطلعت السلالم، وظهرت المشكلة".
وأضافت "مشكلته إن البطانة اترفعت بعد طلوع السلم لأن القماشة تقيلة ومطرزة وأنا ماخدتش بالي، ومحدش نبهني، المصورين بيصوروا من قدام واحد بس اللي صور من ورا. عرفت وأنا داخلة القاعة لقيت إيمي سالم كانت ورايا قالتلي رانيا البطانة اترفعت قولتلها خليكي ورايا ودخلت الحمام وظبطته، بس كنت عديت الريد كاربت".
محمد هنيدي
وفي حلقة جديدة من برنامج "قهوة أشرف" الذي يقدمه الفنان أشرف عبدالباقي على قناة الحياة، حل الفنان محمد هنيدي ضيفًا، وتحدث عن أول مشروع في حياته، وكيف فشل.
وقال هنيدي "نزلت مرة واحدة الشغل وأنا صغير وفشلت، كنت أنا وجماعة صحابي بنعمل مشروع مع بعض، جبنا علب واشترينا جاتوهات من حلواني يدينا بسعر صغير ونبيع بسعر أعلى"، مضيفًا "الحلويات اتسرقت مننا واحنا اختلفنا، بس الفكرة كانت موجودة لشغل وقت الفراغ، وكان ليا أصحاب بيشتغلوا في الصيف اللي عطلني اني كنت بلعب كورة وقتها فكان طول الوقت تمارين".
أشرف عبدالباقي
أكد الفنان أشرف عبدالباقي أثناء استضافته في برنامج "عين" على قناة الحياة، أنه يحرص على عدم وجود تنمر في عروض فرقته "مسرح مصر"، متحدثًا عن عرض كان يقدمه ويسخر خلاله من وزن ويزو "فيه حرص عشان ميبقاش الحكاية فيها تنمر، وكان عنوان الحلقة التنمر، وهو حاجة وحشة أوي فكرة إننا نصطاد حد وزنه زيادة ونتريق عليه، كان فيه حاجة بايخة سمعتها عن مدرس اتريق على بنت سمرا وطلب من الأولاد يتريقوا عليها، احنا ضد ده تمامًا، بس هي ويزو نفسها بتقعد تتريق على نفسها".
أحمد فهمي
استضافت المذيعة وفاء الكيلاني، في برنامجها "تخاريف"، الفنان أحمد فهمي، وحكى لها موقف تعرض له أثناء دراسته في الجامعة، بعد تقديمه لفيلم ساخر "رجال لا تعرف المستحيل" مع أصدقائه شيكو وهشام ماجد، ووقتها تم إلقاء القبض عليهم والتحقيق معهم في أمن الدولة بتهمة السخرية من النظام.
وقال فهمي "اعترفت في أمن الدولة إني عيل تافه، كنت انا وهشام ماجد وشريف نجيب المؤلف، وأصحابنا مكملوش معانا، دخلت لقيت الضابط حاطط ملف كبير وعليه صورتي، الموضوع كبير وتحقيقات حاسس إني في حلقة من رأفت الهجان، وبعدين دخلت قالي عرفت من اللي قبلك كل حاجة، قلتله قبل أي سؤال ده شكل إنسان عنده بعد أو عمق في شخصيته، قالي لا أنا عارف إن شكلك تافه، طلع سي دي قالي الفيلم حلو جدا وبضحك عليه، بس عايز أعرف انت توجهاتك إيه. كان في الفيلم تجاوزات بنعملها بهبل واتاخدت بشكل تاني".
مدحت صالح
أكد الفنان مدحت صالح في حواره لبرنامج "شريط كوكتيل"، الذي يقدمه الفنان هشام عباس على قناة الحياة، أن لو عاد به الزمن لن يقدم شخصية "العندليب الأسمر" عبدالحليم حافظ في مسلسل "السندريلا".
وأضاف "واضح إني زعلت ناس كتير في الشخصية دي حسيت كده ساعتها، وتقريبًا كان فيه حد تاني بينتج نفس الحدوتة بشخص آخر. واضح إن مكنش ملائم ألعب الشخصية دي"، متابعًا "أنا بعتبر نفسي ضيف على التمثيل معنديش فكرة إني داخل التمثيل أصارع وأنافس بعمل شخصية بحبها، ومكنتش الشخصية الرئيسية في العمل، يمكن كان فيه حد تاني يعمله أحسن مني".
أحمد مكي
تحدث الفنان أحمد مكي في حلقة جديدة من برنامج معكم، الذي تقدمه الإعلامية منى الشاذلي على قناة CBC، عن تجربته مع المرض، وقال "جالي فيروس مالوش علاج بيضربلك حاجات بتعالجها لوحدها، قعدت شهر ونص بتعالج غلط وشكيت إنه مرض خبيث مكنتش بعرف أبلع مايه، جاتلي فكرة صادمة دلوقتي التلاجة فيها أكل كويس ما لذ وطاب مش عارف تاكل، عندك ابن مش قادر تحضنه ولا تيجي جنبه، عندك جسم قوي بس نايم زي قطعة الخشب، كان درس وعيتله جدا، الإنسان عبارة عن لسان مش اكتر الضربة دي خلتني أفكر كتير تاني عشان أعدل من نفسي".