حلت الفنانة فيفي عبده، مساء أمس السبت، ضيفة على برنامج "العاشرة مساء"، الذي يقدمه الإعلامي وائل الإبراشي على قناة دريم، وردت فيفي على الانتقادات التي طالتها بعد سفرها إلى روسيا لحضور مباراة المنتخب المصري أمام نظيره الروسي في مونديال روسيا 2018، وتحميلها والوفد الفني الهزيمة. وننشر في السطور التالية أبرز التصريحات التي جاءت على لسان فيفي في الحوار.. - دوروا عن السبب الحقيقي وراء هزيمة المنتخب، الفنانين مش السبب فيه مسؤولين ومدربين هما اللي مفرحوش الناس. - مقولتش لحد تعالى سفرني الناس بتتكلم كأني عاملة جريمة، وبنتعزم في كل المناسبات الرسمية وده فخر، احنا مش نكرة احنا حاجة مهمة جدا. - أنا مصرية لو قالولي تعالي جهنم هروح، ماليش في الكورة روحت عشان مصر بس. - أنا مروحتش ولا حد من زمايلي راح فندق اللعيبة كل زمايلي، متحركناش من غير بعض لا شفنا لعيبة ولا نعرف هما فين - استغربت إزاي ماجدة اتكلمت كده وهي قعدت كتير في بيتي، موجهة كلماتها لماجدة "وانتي لو جالك تذكرة مكنتيش هتروحي، يعني زعلانين كلنا منك ومن كلامك الجارح عننا وفيه شكوى في النقابة لانك قولتي كلام جارح، شوفيلك كيس لب اتسلي فيه بدل ما تتكلمي عننا، عيب تتكلمي عننا بالشكل ده مشوفتيش مننا غير كل خير وأدب ربنا معاكي والقضاء العادل وكلنا مش هنسيب حقنا". - اتظلمت أنا وزمايلي. - أنا اكتر واحدة مشجعة للشباب وبشيلهم على راسي، التذكرة لو هتسعد أي بني آدم كنت ادتهاله، بس مش بإيدي ومكنتش أعرف سافرت عشان أحيي مصر مش عملية تذكرة، لو التذكرة مضايقة الناس أوي كده هدفع تمن عشر تذاكر مش احنا اللي خلينا اللعيبة يخسروا، وكنا نتمنى نرجع فرحانين ومش بس احنا اللي خسرنا كل الدول العربية خسرت والدول الأوروبية، أنا كنت في مباراة واحدة اللي قبل مني ايه واللي بعد مني ايه. - ليه بتقللوا من قيمة الفن، الفن ده مهم جدا بشتغل بقالي 35 سنة اللي بشوفوا دلوقتي مشوفتوش قبل كدا ومحدش يرضى بيه. - فيه حفلة دخلتها كان كلها يهود واحنا ما بينا صلح، واترمى عليا العلم الإسرائيلي اخدته ورميته تحت رجليا وقلت يا أحلى اسم في الوجود يا مصر. - في موضوع البنزين اتكلمت من سنة فاتت مش جديد ودي غلطتي إن الحاجة اللي مفهمش فيها ماتكلمش فيها. - اتعلمت الصلاة من أمي، فضلت طول عمري مش عارفة بيقول ولا الضالين ولا ولا الضاليم، معنى كده ان ربنا مش هيغفرلي، هيغفرلي طالما عرفت الصح والغلط. - لا يمكن اتهكم على شعبي أنا فقيرة مطلعتش في بُقي معلقة ذهب وألماظ، بدأت من الصفر وعملت نفسي بنفسي. - مبفهمش في السياسة غير مين رئيسي ولا بفهم في الدين غير اني مسلمة وموحدة بالله. - بعتذر للناس كلها وتوبة ماليش دعوة بأي حاجة وهرجع تمن التذكرة. - أي حاجة بتتقال عن فيفي عبده مكسب لفيفي عبده، أي حد هياخد السيئة وأنا هاخد الحسنة في كل الحالات أنا اللي كسبانة.
