مواطنون عن منافذ لحوم محافظة البحيرة: "سعرها مناسب لكن ينقصها التنظيم" (صور)

تشهد منافذ بيع اللحوم المخفضة الطازجة، التابعة لمحافظة البحيرة، زحامًا وإقبالًا شديدين من المواطنين، قبل عيد الأضحى المبارك في ظل طرحها بأسعار تنافسية تقل كثيرًا عن الأسواق.
وتباينت آراء المواطنين عن مستوى اللحوم المعروضة وجودتها، فبينما أبدى عدد كبير منهم رضائهم عن اللحوم المعروضة وجودتها، أبدى آخرون بعض الملاحظات السلبية تتعلق بارتفاع نسبة الدهون في اللحوم المباعة.
في البداية يقول علي الصايم، موظف: "خطوة ممتازة من المحافظة وأنا شخصيًا استفدت منها كتير، عندي أسرة كبيرة واشتريت كيلو لحمة، ولما يكون الفرق في الكيلو، جنيه واحد ده مبلغ كبير طبعًا، ويوفر لكل أسرة".
وقالت منى عبدالفتاح، ربة منزل: "بصراحة كنت قلقانة من اللحمة دي الأول، واشتريت كيلو واحد على سبيل التجربة، لما عملته طلعت حلوة جدًا واستوت معايا بسرعة، وأنا جاية أشتري تاني كمية للعيد".
وقال عبد العظيم ساري، موظف: "اللحمة ممتازة بالنسبة لسعرها بس العيب الوحيد هو الزحام، إحنا اتبهدلنا على ما عرفنا نشتري ووقفت أكتر من ساعة ونص، والناس إلي بتبيع بتمشي معارفها الأول، فيا ريت يبقى فيه تنظيم شوية، وتتوزع أرقام لترتيب الناس".
وقال علي الزرقا، محاسب: "بصراحة تجربتي مع اللحمة دي مكانتش كويسة بعد ما اشتريت روحت البيت لقيت فيها نسبة دهون كبيرة جدًا، تقريبًا فرق السعر عوضوه في الدهون دي".
وقال سيد عبد العظيم، تاجر: "اللحمة مستواها مقبول بس طبعًا ما توصلش لنفس درجة اللحمة إللي بنشتريها من الجزار، كل حاجة ولها تمنها وكل فولة وليها كيال، عن نفسي بعد ماجبتها ما عجبتنيش ورحت اشتريت تاني من الجزار".
وقال عمرو أبو علي، دبلوم: "علشان تشتري وتاخد حتة حلوة لازم تكون عارف الناس إللي بتبيع غير كده هتاخد دهون كتير، الموظفين بتوع مجلس المدينة بياخدوا الأماكن الحلوة من العجل، والبواقي بيدوها للمواطن".
وقالت مروة صابر، معلمة: "اللحمة زي الفل بس فيه ناس مش بيعجبها العجب وعاوزة تاخدها كلها حمرا مفيهاش حتة دهنة واحدة وده طبعًا مش منطقي مع السعر إللي بيتباع بيه".
وقالت المهندسة نادية عبده، محافظ البحيرة، في تصريحات ل"مصراوي"، أن المحافظة استطاعت توفير 200 عجل طازج بسعر 92 جنيهًا للكيلو الواحد، لبيعها بمنافذ الوحدات المحلية على مستوى المحافظة بالتنسيق مع الشركة القابضة للصناعات الغذائية بوزاة التموين.
وأضافت، أن اللحوم المعروضة على المواطنين تخضع لإشراف كامل من مديرية الطب البيطري، للتأكد من استيفائها للاشتراطات الصحية، وعرض اللحوم بطريقة صحية وسليمة، ومراقبة نقلها في سيارات مستوفية للاشتراطات الصحية.