أسعار الحديد والأسمنت تصيب قطاع البناء والتشييد بالأقصر بالشلل

أصيبت حركة التشييد والبناء بمحافظة الأقصر بشلل تام نتيجة ارتفاع أسعار مواد البناء، خصوصا الحديد والأسمنت إلى نسب غير مسبوقة وتوقفت أعمال بناء العقارات الجديدة في مختلف مدن وقري المحافظة.
عبد الناصر محمود - تاجر حديد وأسمنت- يقول ل"مصراوي" إن الحديد يمر بحالة ركود كبيرة بسبب ارتفاع سعر الطن إلى عشرة آلاف و500 جنيه لأول مرة فيما تجاوز سعر طن الأسمنت ال800 جنيها.
ويضيف محمود :" عندما كان يرتفع سعر الحديد المحلي في السابق كنا نتوجه للحديد المستورد، لكن ارتفاع سعر الدولار بسبب تعويم الجنيه رفع أسعار الحديد المستورد لأرقام خيالية".
ويقول علاء شوقي - مقاول- "بقى لي شهر قاعد أنا والعمال في البيوت، الحركة نامت خالص محدش بقى قادر يبني بسبب الأسعار اللي ولعت".
يضيف شوقي :"احنا حرفيا بيوتنا بتخرب وعيالنا هتتشرد لو فضل الحال علي الوضع ده.. احنا دلوقتي من غير شغل وفي نفس الوقت أسعار كل حاجة زادت أضعاف، هل يرضي حد الكلام ده".
بينما قال أحمد عبد الرحيم عامل بناء:" أسعار الحديد والأسمنت بقت فوق طاقة الناس وانا بقى لي شهرين دلوقتي من غير شغل، مين هيبني وطن الحديد قرب من 11 ألف جنيه والأسمنت 870 جنيه، الناس هتاكل ولا تبني".
يوسف حسن" 26 سنة" يعمل بالسياحة يقول ل" مصراوي": أنا خاطب من سنة ونص وبعد 5 سنين شغل قدرت أحوش 50 ألف جنيه على أمل أبني شقة تكون عش الزوجية فوق البيت اللي بناه والدي، ولكن الواقع المرير بيقول إن الفلوس اللي معايا مش هتكفي تمن الحديد بس".
يشير حسن إلى أن الأعباء المالية تضاعفت على كاهله بعدما ارتفعت أسعار مواد البناء من حديد وأسمنت وطوب فضلا عن ارتفاع أسعار السلع والخدمات ومواد التشطيب من كهرباء وسباكة ودهانات وسيراميك.