أحمد النجار: أهلي عرفوا أني شاعر بعد ''جائزة نجم'' وديواني القادم ''ركابية''

أحمد النجار، شاعر شاب، كلامه عامي وواضح وبسيط وشبه جيله، بيقول أشعاره في مواقف الأتوبيس وعلى القهاوي وفي الشوارع، بيطلقه على صفحته على "فيس بوك"، ويغنيه لو لزم الأمر في "تراكات" على "الساوند كلاود"، يقوله أحيانا بلهجته الأسوانية المميزة، أو مع رفيق الرحلة "أحمد الطحان"، أو في ديوان شِعر جديد زي "تراتيل" و"كاموفلاج".
"النجار"، فاز في الفترة الأخيرة بالمركز الأول في جائزة أحمد فؤاد نجم لشعر العامية تحت رعاية رجل الأعمال نجيب ساويرس، مصراوي تواصل مع الشاعر الشاب للحديث عن عالمه، بداية رحلته القصيرة-حتى الآن- في بحور الشعر، حكاية كل ديوان له، الفكرة واختيار القصايد والتنفيذ.
سألناه عن تأثره بالتراث الصعيدي، خاصة الغنا عند أهل أسوان، وأحلامه المؤجلة مع رفيقه "الطحان"، مين دفعه للتقديم في الجائزة، وتوقعاته، والكلمة اللي قالها لما فاز بيها، ومين أبرز شعراء جيله من وجهة نظره، وأخبار الديوان الجديد.
- امتي قررت تقدم في الجايزة؟
قررت أقدم للجايزة من بعد ما مصطفى إبراهيم كسبها السنة إللي فاتت لإني بحبه على المستوى الشخصي والشعري واتمنتيت أبقى بعده، بالإضافة إلى حبي الشديد للفاجومي والخال وباقي العباقرة من جيلهم، وكل الناس شجعوني ولكن مش هنسى كلمة الشاعر أشرف الشافعي قالي قدم وهتاخد مركز.
- قدمت في جوايز قبل كدا؟
أول جايزة أقدم فيها، وأول جايزة أفوز بيها
- أيه شعورك لما أعلنوا إنك فوزت؟
شعور بالفرحة مش ممكن توصفه الكلمات.. بالذات بعد شهادة المقربين من نجم الله يرحمه، و نوّارة بنته ربنا يحفظها .
- في كلمة الجايزة.. ليه اهتميت بذكر زمايلك من الشعراء؟
ان الجايزة من حق كل زمايلي لإنهم هم اللى علموني ومن غيرهم عمري ما كنت هقف على المسرح ده، هما السبب بعد فضل ربنا وأهلي.
- أبرز التعليقات اللي شوفتها بعد فوزك؟
إن كل زمايلي اللى معايا في القايمة فرحانين بفوزي كأنهم فاوزوا معايا، لإنهم بالفعل فازوا معايا، لإني تلميذهم وبتعلم منهم وأنا من غيرهم ولا حاجة.
- ردك على اللي انتقدوا فوزك بالجايزة وإنك مش الأفضل في جيلك؟
طبعا أنا مش الأحسن في الجيل، التقييم كان على عمل فني ومش على شاعر.. كاموفلاج استحق الجايزة مش أحمد النجار.
- وامتى بدأت علاقتك بالشعر؟
من الطفولة لكن الكتابات موصلتش لمكانة الشعر، ومع الخبرة الموضوع اتطور والاحتكاك بالوسط الأدبي والثقافي أثقل الخبرة.
- فصحى ولا عامية؟
البداية كانت بالفصحي، كتبت شعر عن فلسطين والقضايا المتعلقة بالأوطان وناس كتير كانت بتتريق وتقولي اكتب بالعامية عشان نفهم.
- في أسرتك شاعر أو محب للشعر أثر فيك؟
أنا من أسرة أسوانية، جزيرة المنصورية بكوم امبو، الشعر بيجري في دمهم تراثاً، والأفراح في البلد كانت بتقوم على الشعر الارتجالي، مفيش حد من الأسرة شاعر، الأسرة معرفتش إني بكتب شعر إلا بعد الجايزة.
- أول قصيد حقيقة- من وجهة نظرك- كتبتها؟
أول قصيدة عامية حقيقة ليا كانت " بيت عتمان " رثاء لجدي لما توفى.
- نشرت كتاباتك فين؟
في مجلة كلمتنا ودقة جديدة وصفحات مبدعون مما قرأت وموقع الوطن وعلى صفحتي الشخصية على فيس بوك وهي اللي غيرت حياتي.
- و ديوانك الأول؟
كتبته ما بين عام 2010 لحد 2013 ونزل في معرض القاهرة الدولي للكتاب في 2014، بدعم كبير من الشاعر سيد شعبان و دار العلم و للنشر والتوزيع.
- والخطوة جات إزاي؟
كان عندي مجموعة قصائد والناس شايفين إنها لازم تتنشر وأنا مش مقتنع، قالولي هات بس وبعدها هنقنعك،كنت خايف جدًا وقررت إني بمنتهي السرعة أحول القصائد من قصائد عادية لمشروع.
غيرت اسم القصيدة من قصيدة لبيت أو شارع وبما أني بحب الغنا والمزيكا والمقامات قررت أسميه تراتيل تأثراً بترتيل القرآن الكريم وبما إنه مقسوم لشوارع وبيوت.. أصبح "تراتيل .. بين الشوارع و البيوت".
- "كاموفلاج" الديوان التاني ليك .. كلمنا عنه؟
الديوان التاني بالنسبالي قفزة في كل حاجة حتى في طريقة التفكير، اشتغلت فيه سنة ونص عديته حرف حرف واهتميت بكل التفاصيل اللي فيه، حلم بحاول أكمله للآخر وربنا يقدرني وأكمل.. وهو بالتعاون مع دار دون للنشر والتوزيع أو بيت دون وهما بمثابة أهلي مش الناس اللي بشتغل معاهم.
- مواقع التواصل الاجتماعي ساعدتك انت وجيلك في نشر كتابتكم؟
طبعا السوشيال ميديا بتساعد، لكن فيه مقابل عشان توصل للناس.. وفيه ناس صادقة فعلا، وناس بتاجر بيهم أو بتلعب على مشاعرهم، وبتتاجر بنفسها عشان توصل.
الموضوع سلاح ذو حدين يا تبقى نفسك وتوصل وانت سليم يا تخسر نفسك وتوصل وانت بايع القضية.
- ليك مقاطع غنائية بصوتك لأشعارك.. كلمنا عن التجربة؟
أنا بحب الغنا، وشايف إن الشعر بيوصل أكتر لو تم دمجه بالموسيقى والألحان البديعة وعشان بحس كلامي جدًا بلحنه.. أنا كمان عندي مشروع غنائي بحاول أعمله بس أكل العيش مش مخلني عندي وقت اشتغل فيه.
- عندك تجارب شعرية مشتركة مع آخرين منهم "الطحان".. إيه اللي بيشدك للمنطقة دي؟
مبدئيا الطحان ده أخ مش مجرد شاعر، بيننا كيميا مشتركة لدرجة إن فيه بعض الجمل بنكملها لبعض ومبنعرفش مين فينا اللى كتبها.
- استخدمت ألحان مشهورة في كتابة شعرك.. كنت قاصد الربط بينهم؟
طبعاً.. أنا بحب جدًا أكتب على ألحان قديمة وأستحدث كلام يناسب الواقع الحالي من باب ربط الماضي بالحاضر عشان يلمس الناس أكتر.
- معرض الكتاب قرب.. هنشوف ديوانك الجديد؟
لا مش هنزل المعرض ده، و هنزل المعرض إللي بعده بإذن الله
ليه؟
عشان أنا مش من هواة تجميع أي كلام والنزول بيه بغرض البيع وبس، أنا بشتغل على مشاريع لما المشروع بيخلص بنزله.