ان جيت للحق ميدو احق

مع اقتراب كل سنة من نهايتها تلاقى خير اللهم اجعله خير كل حتة عاملة استفتاء, احسن ممثل, احسن مذيعة ,اجمد اغنية, شخصية العام, وعادة بتنتهى بحاجة من اتنين، الاولى و دى حاجة ظريفة جدا الحقيقة وهى انك تلاقى الجهة الفلانية بتعلن نتيجة الاستفتاء مع ان اساسا محدش اعلن عن الاستفتاء ده قبل كدة ,طب الاصوات جت منيييين؟
محدش تروح دماغه كدة و للا كدة الناس كانوا عايزين يريحونا مش اكتر, الاحتمالية التانية بقى انك تلاقى كل جهة مختارة واحد شكل ,يعنى ناس مختارة خالد الصاوى مثلا احسن ممثل و ناس تانية مختارة خالد ابو النجا (ده طبعا على نتائج 2009 عشان منصادرش على نتائج 2010) وده شئ مش منطقى خالص, يعنى مثلا بره بتلاقى ان الاستفتاءات كلها بتوصل لنتيجة واحدة متفق عليها من الجميع, بحيث يكون المسلسل الفلانى رقم 1 والمسلسل الفلانى رقم 17 وهكذا ومحدش بيشكك فى النتائج دى لان الاستفتاء اتعمل بشكل علمى وموضوعى انما هنا كل واحد عايز يوجب مع واحد يطلعه الافضل.
فالحكاية لا تتعدى كونها انطباعات شخصية، فطالما الحكاية كدة انا قررت انقللكم انطباعى عن شخصية العام و الله اعلم، شخصية العام فى نظرى هى احمد حسام ميدو!
وعلى فكرة انا اخترته لاسباب بعيدة عن الرياضة خالص, اخترته بسبب موقف محترم عمله احنا فى امس الحاجة له ورغم كدة محدش انتبهله خالص، وهو ان على الرغم من ان الرجل عارف كويس جدا انه مش هيلعب فى المنتخب ابدا وعلى الرغم ان فيه فجوة واضحة بينه وبين الجهاز الفنى، الا انه بعد مباراة ويمبلى الشهيرة اللى اتغلبنا فيها من انجلترا 3-1 اعلن ميدو بعد المباراة انه فخور باداء المنتخب وهيروح التمرين رافع راسه وان الهزيمة حصلت نتيجة ان الضغوط كانت كبيرة على المنتخب مش لان فيه اخطاء من الجهاز الفنى.
اللى انا عايزه اقوله انه ركن مشاعره وخلافاته الشخصية على جنب احتراما للكيان الكبير اللى بيمثل بلده فى الوقت اللى كان ممكن يستغل الموقف فى التشفى وتصفية الحسابات زى ما كتير من الناس بتعمل ولو كل الناس بتعمل زيه كان اتشال من على اكتاف البلد دى هم كبير جدا.
فى كل المجالات لو قدرنا نتصالح مع نفسنا وننحى خلافاتنا جانبا احتراما للصالح العام لا فيه موهبة مش هتاخد حقها ولا كفاءة هتهج على بلد تانية وهنبقى احسن بلد فى الدنيا.
انا اخترت "ميدو" لانه قدم نموذج نتمنى انه يسود بين الناس للانسان الخلوق اللى بيقدر يجاهد نفسه عشان يتصرف بشكل محترم... إنتوا هتختاروا مين؟