د.إيهاب ماجد: أول خطوة

زمان وأنا فى الثانوية كان فى مدرس انجليزى اسمه مستر منير كنت بحبه أوى وهو كمان ، قالى مرة لو عاوز تنجح يا إيهاب وتجيب مجموع كويس أعمل بالنصيحة دى ، قلت له " ايه هى " قال " خلى هدفك النجوم علشان لو وقعت تقع بين السحاب " قلت " مش فاهم " قال " يعنى لو كان حلمك تنجح وخلاص وتجيب 50% ده ممكن يخليك تسقط ولو كان حلمك تجيب 100 % ده ممكن يخليك تجيب 95 .
ومن ساعتها قررت ان دايماً تكون أحلامى النجوم ، وانى ما أقبلش إلا الأفضل ، سمعت مرة مقولة بتقول من الغريب عندما ترفض الجيد وتصمم على الافضل فأنك مع الوقت تحصل علي الأفضل .
أول خطوة
خلى هدفك النجوم
أكتب قائمة بالحاجات اللى مش هتقبلها تانى فى حياتك ، أكتب قائمة بالحاجات اللى مش هتقبلها تانى فى شخصيتك وعاداتك وافكارك ، قولها بصوت عالى مش هأقبل اكون تابع لحد ،مش هأقبل افكارى السلبية عن نفسى ، مش هأقبل اكون كداب ، مش هأقبل اكون مستهتر فى حياتى ، مش هأقبل أضيع وقتى تانى ، مش هأقبل اكون حد عادى كده وخلاص، مش هأقبل اكون عصبى .......
واكتب قائمة تانية بالحاجات اللى بتتمنى أنك تكونها وتكون موجودة فى حياتك وشخصيتك ، أكتب أفضل سيناريو لحياتك الجاية ، قول بصوت عالى مش هأرضى غير انى أكون صادق، متميز، إيجابى ، مش هأرضى غير انى أكون محترف فى شغلى، مش هأرضى غير انى أكون منظم ومقدر لوقتى وحياتى ، قولها بصوت عالى وكله ثقة وايمان مش هأرضى غير انى أكون نموذج لجيلى والاجيال اللى جاية، مش هأرضى غير انى أكون سبب فخر لعائلتى ، مش هأرضى غير بالأفضل ..
دلوقتى عاوزك تغمض عينيك وتخيل نفسك بعد ما بقيت اللى أنت عاوز تكون عليه ، وتخيل انك بقيت الانسان اللى انت بتتمنى تكونه ، واستمتع وحس القوة دى جواك وبين ايديك وقرر من دلوقتى انك هتتصرف حسب الحياة الجديدة اللى انت تستحقها ، تخيل ده مرتين وثلاث مرات كل يوم وهتلاقى نفسك بسهولة يوم ورا يوم بقيت زى ما انت عاوز
واشوفك المرة الجاية وحياتك لسه فيها أكتر والقوة بين ايديك
للتواصل مع ايهاب ماجد
Email : ihab_maged @yahoo.com