هاجر عباس تكتب.. أنا آسف يا شعب

جملة بتمني اسمعها من الريس أثناء محاكمته ,بتخيل أنه وسط محاكمته واقف بيقول "انا اسف يا شعب" اسف علي الفساد والفقر والظلم اللي في البلد , اسف علي سكوتي عن رجال الاعمال الفاسدة وعلي الاقتصاد المنهار وعلي كرامتكوا اللي انا معرفتش احافظ عليها وسط شعوب العالم واسف كمان اني كنت سبب في قتل الشهداء
أو مثلا يقولنا أسف عشان معرفتش اوفر منظومة تعليمية عالية أو معرفتش أوصلكوا لمستوى البلاد التانية أو حتي يقولنا أسف علي البطالة والرشوة وفساد الذمم والاخلاق اللي حصل بسبب فساد الدولة وكمان اسف لاني سبت تجار المخدرات تحاول افساد البلد وحاكمت اللي بيدعي للدين والاخلاق عشان كنت بعتقد أنه عايز الكرسى , بجد أسف لكل واحد عاطل او مظلوم او شهيد او متاكل حقه وفقد اولاده عشان الفقر واسف لواحد ساب تعليمه عشان يصرف علي اهله بعد وفاة ابوه و دا لاني معرفتش اعمل لابوه معاش كويس بعد وفاته
وبرضو مش هنسي اقول اسف للعشوائيات والناس اللي بتموت فيها من المياه الفاسدة والصرف الصحي وغيره و غيره , دى حاجات من خيالي كان نفسي اسمعها وماكنتش الاول بفكر انه يقولنا كده بس فكرت في دا فعلا لما استفذتني جماعة انا اسف يا رايس و عايزة اعرف اسف يا رايس علي ايه بالظبط؟ انت عملتله ايه عشان تقوله كده ؟ انا لاقيت حاجات كتير ممكن الريس هوا اللي يبقي اسف عليها بس بصراحة ملاقتش حاجة واحدة توحد ربنا عشان الشعب يقوله انا اسف
ويارب فعلا الريس يقول انا اسف عشان الجماعة دي تعرف ان الثوار علي حق ومفيش داعي للاشتباكات اللي بتحصل وبتيجي في القنوات قدام شعوب العالم كلها كده وادينا في انتظار حدث زى دا وربنا يحمي بلدنا قولوا امين
استنوا ملحوظة هااااااااااااااامة
ما اعتقدش انه يقولنا اسف لانه انكر اللي عمله فينا اصلا بس معلش انا خيالي هوا اللي واسع شوية او شويتين يعني :)
وهي دي نهاية واحد كان له هيبته و وقاره بس ظلم بلده لمدة 30 سنة واللهم لا شماتة طبعا وربنا يتم محاكمته علي خير