المصريين بيحرقوا 22 مليار جنيه في السنة !!

لو بتدخن... علله أشوفك بتتكلم عن أي حاجة وحشة (أو حتى حلوة) في البلد .
مصر بتحرق 696 جنيه كل ثانية.
يعني على ما سعادتك تكون خلصت المقال ده (في دقيقة واحدة).. تكون مصر حرقت 41760 جنيه!!
حسب مصادر من الطب الوقائي، التابع لوزارة الصحة في مصر، وُجد أن عدد المدخنين بشكل منتظم، يعادل 13 مليون مدخن،من إجمالي التعداد سنة 2007..
الناس دى بتحرق ما يعادل 80 مليار سيجارة سنويًا، يعني 4 مليار علبة (333 علبة للفرد في السنة)... ولو قلنا إن ثمن العلبة الواحدة في المتوسط، يعادل دولارًا واحدًا (5.5 جنيه)، فهذا يعني أن متوسط -الحرق- السنوي 4 مليار دولار، يعنى تقريبا22 مليار جنيه!!
(من الجدير بالذكر أنه في موقع وزارة الصحة، ذكر أن إجمالي الاستهلاك من صافي الدخل، يعادل 5 مليار جنيه، يعنى تمن العلبة جنيه وربع، وده غير منطقي، عشان مفيش علبه بجنيه وربع, حتى مع الأصناف الرديئة، وأعتقد أن الخطأ هو وجوب تغيير العملة من الجنيه إلى الدولار في المقال.. حيثُ إنها الأكثر منطقية).
تخيل لما إنت تدي الشعب 22 مليار جنيه وتقول له ولَّع فيه..
المضحك المبكي في الموضوع أن تكلفة إنشاء مستشفى السرطان الشهير 57357، كانت نصف مليار جنيه، شاملة كل شيء (ما هو فوق وتحت الطاولة)... أي أنه بالمبلغ ده، ممكن نبني 44 مستشفى..كل سنة!!!
بالمبلغ ده، ممكن نجوز 4400 عريسًا وعروسة، بواقع نص مليون جنيه لكل واحد (متخيل الرقم؟!)
وتكلفة إنشاء السد العالي كانت حوالي نص مليار جنيه تقريبًا، ولو غيرنا قيمة العملة، لتتوافق مع الأسعار الحالية، تبقى تكلفة السد تعادل 18 مليار جنيه... يعني هنبني سد جديد كل سنة!
طيب تخيل معايا إن تكلفة إنشاء مدرسة من الدرجة الأولى حوالي 10 مليون جنيه... يبقى هنبني 2200 مدرسة سنويًا!
طيب لو قلنا جامعة على المستوى العالمي... بواقع 1 مليار جنيه للجامعة الواحدة (رقم مبالغ فيه جدًا)... هنبني 22 جامعة في السنة!
متخيل حجم الرقي والنظافة اللي المفروض نكون فيها؟؟.. متخيل إن كتير من مشاكل الأزواج هتنتهي؟! وحتى مشاكلنا إحنا هينتهي جزء كبير منها!
إنت / إنتي.. متخيلين حجم النماء والازدهار اللي المفروض نكون فيه بمجرد تفكيرنا في توفير تمن المحروقة دي؟!!
طيب لو قلت لك بقى إن لسه فيه مصاريف بتتحملها الدولة سنويًا (لأن غالبًا المريض مبيقدرش يدفعها) بسبب أمراض التدخين... تشمل علاج السرطان بجميع ده غير أمراض الدم والقلب والرئة والشرايين.و..و...!
و إن تمن الحقنة الواحدة للعلاج الكيماوي بحد أدنى 400 جنيه.. هتقول إيه؟؟
ولو قلت لك إن فيه كورسات علاجية للسرطان بتتاخد بشكل شهري تمنها 21 ألف جنيه ولمدة لا تقل عن 6 شهور!
طب لو قلت لك إن الحقنة بتاعة جلطات القلب تمنها من 500 إلى 6000 جنيه!
عارف الحاجات دي كلها بتكلف الدولة كام؟!
3 مليار جنيه مصري!!
يعني سنويَا ربنا بيدي الشعب ده 25 مليار جنيه.... والشعب ده بيحرقهم.... كده... بمنتهى البساطة والسعادة... عاااادي!!!!
قبل ما أنتهي... عايز أفكرك بحاجة... مرة زماااان... كان فيه قرية عايشة في أزمة مالية وقحط وجوع... اجتمع عمدة القرية بأبنائها، وقال لهم إن كل واحد لازم يتبرع بكباية لبن.. بس بشرط... إن اللبن ده هيتم التبرع بيه ليلاً في برميل موجود وسط القرية... كل واحد من الناس راح اتبرع بالليل من غير ما حد يشوفه زي التعليمات ما بتقول... تاني يوم الصبح عمدة القرية بيبص للبرميل لقاه مليان ميه!!... كل واحد من أهل القرية اعتمد على إن غيره هيحط لبن بجد، وإن إضافته لكباية الميه، مش هتأثر، ومش هتبان!!... القرية دي اختفت بعد كده، لأن كل واحد فكر في نفسه وبس، وهو متصور إن اللي بيعمله ده، حاجة بسيطة جدًا، مش هتأثر على المجتمع بشيء... والنهاية... إنهم اختفوا!!
قد تكون القصة دي خيالية، لكن هو ده اللي بيحصل دلوقتي.. لما كل واحد بيشتري علبة سجاير ويقول لك يا عم ده هي 5 جنيه، أنا مالي ومالي ال 25 مليار اللي الراجل بيتكلم عنهم دول؟!.. كل واحد بيفكر لوحده، ويعيش لوحده، ويقول ده هي خمسة... وفي الآخر بنجمع ال 25 مليار (على داير المليم) ونحرقهم....نحرقهم!!!!!
بجد لو بتدخن... علله أشوفك بتتكلم عن أي حاجة وحشة (أو حتى حلوة) في البلد .
هل يا ترى ممكن يجي يوم سنة 2012 مثلاً، ونقول إن مصر ضمت السجائر إلى قائمة المخدرات والمواد المحظورة قانونًا؟.. يا ترى ممكن نفرض ضرائب جديدة تعادل 100% من قيمة السجائر، ويتم تخصيص صندوق زواج بهذا المبلغ، ليستفيد منه الآلاف؟!..أو...أو.. أو... كلام كتير وأحلام أكتر وآمال أكتر...هل من مستمع؟؟
كل حاجة ممكنة..
مصر بتحرق 696 جنيه كل ثانية.... يعني على ما سعادتك تكون خلصت المقال ده (في دقيقة واحدة).. تكون مصر حرقت 41760 جنيه!!
** جميع الأرقام السابق ذكرها مذكورة في المواقع الرسمية التابعة للجهات المختصة.