اللي ما يشتري... يتصدع

أعزائي المشاهدين، نود أن نحيط سيادتكم علمًا أننا نعتمد في خطتنا الإعلانية.. إحم إحم ..أقصد الإعلامية لهذه القناة، على المثل اللي بيقول (الزن على الودان أمرّ من السحر) كما نود أن نطمئن سيادتكم على أننا نقف وبشدة أمام المثل اللي بيقول (خف حبة تزيد محبة).
بعد قليل، سنبدأ أولى فقراتنا مع الفيلم الإعلانى (التليفون المعجزة) بطولة اتنين من أرخم وأغتت البني آدمين وأكترهم رغيًا!
الأول: أعزائي المشاهدين، عرضنا النهارده مغرى جدًا جدًا (قصده طبعًا إن فيه غراء من النوع اللي بيلزق فيك!!) معانا موبايل فظيع، موبايل مش هتشوفه في أي حته تانية..موبايل فيه خصائص نادرة جدا، الموبايل ده ممكن تشغل صوته وممكن كمان تشغل خاصية كاتم الصوت!! كمان فيه منبه ممكن يرن حتى لو إنت قافل الموبايل!!(طبعا ده على أساس إننا من أهل الكهف ولسّه واصلين طازة!!)
التانى: ماننساش كمان نقول للمشاهدين إن الموبايل اللي معانا النهارده فيه كاميرا ومفاجأتنا ليكو إنه فيه بلوتوث وإنفرا! يلا كلمنا واستفيد من العرض على 33445566 (على أساس إننا جايين من الهند راكبين فيل!!)
(وبعد نص ساعة)
فاصل قصير جدًا جدًا و نعود
معانا ولمدة عشر دقائق الفيلم العربي..
عدنا مره أخرى... يظهر بطل فيلمنا الإعلاني اللي بعده، نص راسه أقرع والنص التانى منكوش، واضح إنه جرب المنتج اللي بيعلن عنه من منطلق (طباخ السم بيدوقه) وكان بيعلن عن المعجزة اللي أول ما تحطها على شعرك تبقى عامل زى اللي وصل مشوار لحد فيشة الكهربا!
وتظهر البطلة المستحيّة اللي يا عيني( يا ولداه) بتغطي شعرها قدّام جوزها عشان خفيف ووحش (إخص عليه!)
وأول ما استخدمت المادة دي.. حوش الإعلانات و الأفلام اللي مش ملاحقة عليها (آه يا ولاد النصّابة)!!
..............................
وصلنا أعزائي المشاهدين لفيلمنا الإعلاني بتاع السهرة -يا صباح الهبل في الجبل-...(المال و البنون زينة الحياة الدنيا).
أنا تعبت يا دكتور ونفسي في حتة عيل يشيل اسمى وروحت لدكاترة كتير وقالوا مفيش أمل!
ماتقلقش يا باشمهندس كل حاجة وليها حل، الموضة دلوقتي رمرمة البرشام وبلبعة المراهم (يا مصبر الوحش ع الجحش !!)
طب إزاي؟!
بالعلبة دي ليك، والعلبة دى لمراتك، خد معلقتين أو أكتر، براحتك، قبل الأكل ووسط الأكل و بعده، وخلال واحد وعشرين يوم، هتشوف النتيجة .. (العناية المركّزة إن شاء الله !!!!)
(و بعد واحد و عشرين يوم)
شُفت يا دكتور، مش مراتي حامل، الدوا جاب نتيجة (يا ابن الهبلة!!!)
مبروك يا باش مهندس مش قلت لك الأمل في ربنا كبير !!!
السادة المشاهدين، زى ما شوفتوا بنفسيكو أى حد مابيخلفش يجى يشترى الدوا ده، ولا أقول لكم، ليه تستنى لما تعرف إنك مابتخلفش، اشتري العلبة مع العفش وأربعها على الريق ( يلا يا راجل إن شاله ما حد حوش و تغور الصحة !!!!)
اغتنموا الفرصه و خد 4 علب لما تشترى 2 ( أصلها علب صلصة!!) وكلمونا على 77777777.
أعزائي المشاهدين نرجوا أن تكون القناة قد حازت على إعجابكم، حيث إننا قد أثبتنا مصداقية القناة في تطبيق أهدافها! قلنا لكم كل حاجة تلاقوها عندنا، منتجات مفبركة تلاقى .. أدوية منتهية الصلاحية تلاقى ..دجالين تلاقى.. موبايلات معمولة تحت السلم تلاقي!
ونود أن نشكر كل من ساهم فى الإضرار بالمشاهد وتصديعه والتسبب له في الإصابة بالضغط والنقطة!