سخنة و بخرف

• باسم سمره .... أو الحاج فتحي ... أكتر واحد مثل صح قوي ... في مسلسل الريان
• باسم سمره .... وخالد الصاوي ... وأحمد راتب .... ثلاثة فنانين من نوعية واحدة ... ممثل محترف ... عاشق لأداء الشخصيات المختلفة .... مهتم بتفاصيل الشخصية .... فنان قوي
• ريهام عبدالغفور .... نضجت جداً في الريان ... إلحقوها قبل ما ترجع ... في مستواها
• فيفي عبده مدرسة لوحدها في الاداء التمثيلي .... تون واحد في الصوت .... مش بتبص غير على الكاميرا .... كل الجمل الحواريه يصاحبها هز للرقبه وغمزات بالعين .... مع شهقات غير طبيعيه
• أقترح تبديل إسم قناة المصراوية .... إلى التاكساجية ... الميكروباصية .... التوكتوكية
• صابرين قلعت الحجاب .... صابرين لبست الحجاب .... انتوا مالكوا .... هتتدخلوا بينها وبين ربها .... هي حره .... انتوا ليكوا شغلها .... كويس ... هنتفرج ونقول احسنتى .... مش كويس هنقلب القناه
• إلى كل من يطلق عليهم إعلاميين ... ويعملون في القنوات المحلية المصرية .... والتي إنتقلت لتذاع على النايل سات ... هناك فرق في نوعية وكم المشاهدين ... يجب مراعاة ذلك وإلااااا ... ترجعوا مكانكم تاني
• نفسي في مطرب اسمعه يكون بيجمع بين أداء هاني شاكر .... إجتهاد تامر حسني .... ذكاء عمرو دياب .... صوت ايهاب توفيق .... حنجرة علي الحجار .... إطلالة محمد منير .... بهجة حكيم .... وهسميه .... الأمير .... أنا حره انا اللى مجمعاه
• فوز الفستان البمبى بالبيبسي .... أثبت ان اللى بياخدوا حقهم في البلد دى هم المزز .... كوسه
• إحنا ليه زعلانين ... من إن فيه ... أبناء مبارك ... ما فيه عبدة الشيطان .... وأولاد العم .... وأحفاد إبليس .... عادي يعني
• واحد زميلي ... كاتب خبر حزين جدا .... مش عارفه أواسيه بإية .... كلمات اللغة وحروفها كلها ... مش هتقدر تعبر عن أسفي لما حدث له ... عموماً ... إقروا الخبر .... النهاردة فقدت واحد من أعز أصدقائى .... وقع من بلكونة شقتي ... من الدور الخامس ... كان بوكسر جامد جدا .... ولما نزلت أجيبه ... ملقيتوش .... إتسرق !!
• سؤال محرج جداً .... ومحدش يفهمني غلط .... هي السلعوة بتلبس فيونكة زرقاء في رقبتها .... ليه ؟؟؟؟
• عجب العجاب في مصر ... الرسم داخل في المجموع .... والدين لأ .... هااهاهاها .... بلد علمانية صحيح .... لكن بتقدر الفنون
• فصل الدين عن الدولة .... ميقدرهوش معناه ونتائجه ... غير فصل المتفوقين
• حبيبتي غادة عبدالرازق ... بس سمارة .... ولا أعرفها