أحمد العسيلي يكتب: إكتب يا تاريخ الّي بنقولّك عليه

إكتب وقول بالمرّة كل اللي نِفسَك فيه
إكتب عن الناس اللي اشتروا
واكتب عن الناس اللي باعوا
إكتب عن الخايفين
إكتب عن الساكتين
ولّا أقولّك! .. لأ
إكتب عن الصابرين
عن الصامدين
إكتب عن الماسكين .. في إيدهُم شَمع
واكتب عن الجايين في عينهُم دَمع
إكتب عن الجدعان
إكتب عن العواجيز، عن الصُبيان
وويلك يا سواد ليلَك إذا نسيت البنات
أو الدمعات
أو البرد اللي كان بييجي ساعات
إكتب يا تاريخ اللي نقول إحنا عليه
إكتب عن الثُوّار، إكتب عن الأحرار
إحكي حكاية الليل اللي جابوا من بَطنُه النهار
إكتب عن الناس اللي خلقوا العيد
سجّل المواعيد
أُحفُر على اللوح القديم كلمات جديدة
بخَط جديد
إرسم قلب طيّب آه، لكن جُوّاه حديد
إكتب كلمتين عن أُم ابنها بتبكيه
إكتب إن دمعتها على خدّها بترويه
واكتب عن الإخوات اللي مابينسوش
عَلّم على كُل الوشوش
واكتب عن الهتافات
إكتب عن البَسمات
إكتب عن الفَرحَة
وارغي عن الأحضان
إملا دوايا الحبر بالألوان
واكتب يا تاريخ .. اللي بنقولّك عليه
-----------------------------------
أحمد العسيلي
القاهرة
11/02/2011
لينك ال Note
http://www.facebook.com/note.php?note_id=10150112551681473