إمسك قلمك ...علي سلامة

إمسك قلمك ...!!!
قابلني في يوم الشاعر الكبير علي سلامة وهو راجل مثقف وعلامة
وقلي بص يا إسلام هنصحك نصيحة لمستقبلك قدام وقالي:-ا
إمسك قلمك إكتب جامد
إكتب لون شخبط عاند
خير أو شر ماهو كلوا وارد
طير وخلي عقلك شارد
إكتب يلا دا شعرك جامد
إكتب يلا دا قلمك صامد
روح يا شيخ ربنا يبارك في الوالد...
بس إوعى تفضل تكتب وتسيب القلم فارد
لحسن يفتكروك تبع حركة أو حزب معارض
وإوعى تفتكر الدنيا هتطلعلك في يوم مارد
ولو وقعت أو إنكسرت قوم بسرعة وعاود
قوم وقول للدنيا أنا جامد
خليك لبلدك وأهلك ساند
وإوعى تخاف تكتب عن فاسد
أو شخصية وعالم صاعد
أو كرتون أو كابتن ماجد...
إمسك قلمك إكتب جامد
إكتب لون شخبط عاند
خير أو شر ماهو كلوا وارد
إوعى تكتب و أنت جبان
إكتب وانت تعبان...إكتب وانت حيران
إكتب وانت مبسوط...أو حتى لو قلقان
إكتب دا فقلمك كل الألوان
إكتب وانت حران...بردان
إكتب وانت حبيب ولهان
إكتب وأنت وارم...يمكن قلمك يبقى ناعم
إكتب لو بتخاف ...يمكن قلمك يبقى جاف
إكتب وأنت في الشارع أو حتى راكب الباص ...يمكن قلمك يبقى رصاص
إكتب وأنت في أي حته إنشاالله من الساعة واحده لحد الساعة ستة...
إمسك قلمك إكتب جامد
إكتب لون شخبط عاند
خير أو شر ماهو كلوا وارد
وإكتب لأي حد عالي أو رئيس مسئول
يمكن تلاقي في يوم لمشاكلك حلول
والعالي هو الله...والله يسعدك؟...إوعى تكتم ضحكتك...دمعتك...قصتك...حبك لأهلك وأصحابك ودنيتك
وبلاش وأنت بتكتب تحس إنك متعالي أو مغرور
إكتب وأنت متواضع وحس إنك مأهور
وإوعى تجرح حد في يوم بكلامك
وإحلم على قدك لتضيع أحلامك
وبص يا إبن الناس حدد هدفك وإرمي أساس
وإوعى تتكبر في يوم على الناس
لتعيش حالك محتاس
إمسك قلمك إكتب جامد
إكتب لون شخبط عاند
خير أو شر ماهو كلوا وارد
ومتنساش تكتب لأمك كلمة حلوة طيبة...حته كده فيها غريبه
وانت داخل وانت خارج حط على راس أمك بوسه
تدعيلك دعوة حلوة تخلي حياتك بسبوسه
وتقولك...روح يابني إوعى تتأخر
أنا مستنياك ربي وقلبي معاك
ووحيات عينك وغينك وكل حروفك ماتسيبش حاجة مبعترة
إحسب كل حاجة وأنت ماسك مسطرة
وكفاية كدا ونكمل بعدين نتقابل كدا يوم الاتنين
عند كوبري قصر النيل هاحكيلك حكاية الأسدين
بس وحيات نور عينك تخلي الموضوع ده بيني وبينك
إمسك قلمك إكتب جامد.......