فيديو..صادق يفتح النار على المطبلاتيه والتوأم

واصل الناقد الرياضى علاء صادق حلقاته الساخرة ضد الاعلاميين و اتحاد الكرة اعضاء مجلس الشعب من بورسعيد والاعلامى المطبلاتى لنظام مبارك السابق وقال الناس خبيتها السبت والحد واحنا خبتنا ماوردتش على حد .حيث قال صادق فى برنامجه حاد وجاد على قناة النهار "الناس خيبتها السبت والحد، واحنا خيبتنا ما وردتش على حد"، اتنين قاعدين على البحر وريحة الزفارة منعنشاهم والزبالة فرشة على الجنبين ولا ريش النعام، والواد الفرفور بيهرش في راسه وعقب السيجارة في ايده، ونفس طويل ومسك ايد أمه وقالها: يا أمه علميني الخيابة، قالت له يا ضنايا هو في الخيابة لك زي، يا ضنايا أنت مش عايز تعليم، دي الخيبة ركباك من ساسك لراسك، يا ضنايا الخيابة مدارس وانت دخلت أجدعها مدرسة، مش انت اشتغلت في الكورة واتحاد الكورة؟، قال لها طول عمري، قالت له: يا ابنى أنت أبو الخيابة وأمها..
الواد حس بقيمته قصدي خيبته، وقرر يعترف لأمه بسره وقال: أنا مش اشتغلت في اتحاد الكورة بس لا ده أنا كمان بقدم برامج رياضية في التفزلون من وراكي، أمه زغردت وقالت له: يعني انت مذيع من اللي بيتهتهوا ويقهقهوا؟، من اللي بيطبلوا وبيرقصوا؟، من اللي بيعيطوا وبيغلطوا؟، من اللي بيكذبوا ويحلفوا؟، من اللي بيهيجوا ويأبحوا؟، من اللي مبيعرفوش الألف من كوز الدرة في السياسة ومبيبطلوش يتكلموا فيها؟، هو انت من اللي كانوا بيطبلوا لمبارك وبعدين قلعوه ولبسوا الميري واتمرمطوا في ترابه؟.. يا ابني ده أنت حاجة كبيرة اوي.. والواد من كلام امه حس بقيمته وخيبته
وقال: خلاص يا أمه انا هكمل في التفزلون، بس بقولك قولي لاختي "خيبتها" مش تتصل بيا تاني في البرنامج بتاعي علشان مش بتحفظ الكلام اللي بقوله لها تقوله لما بنكلمها على فجأة، و"خيبتها" ترمي السؤال وتقفل "الهبلة" من غير ما تلمعني.
وعن التوأم قال أن الشحن للأغبياء الهاربين من عدة مصادر أهمها اثنين من اللاعبين القدامى تاريخهم مشهور بالايقاف اكثر من اللعب، كلاهما له من الصور وهو يشير باصبعه للجمهور اشارات وقحة اكثر من صورهم اثناء اللعب، مشيرا إلى أن اولهم متورط في كل فضائح الشغب في مصر وخارجها، وثانيهما الذي صدر ضده سلسلة من العقوبات، مضيفا أن الأمن البورسعيدي يشاهد المتجمهرين وبيطبطب عليهم بدلا من "لمهم كلهم في شحنة واحدة لاكمال قائمة المتهمين في المذبحة".
واضاف صادق فى برنامجه حاد وجاد ان ترتيب منتخب مصر وصل الى المركز 64 فى تصنيف الفيفا لاول مرة فى تاريخنا وهو ان دل فهو يدل على خيبتنا والامر التالى هو تدخل الفيفا رسمياً فى عمل اتحاد الكرة والغاؤه لاجتماع الجمعية العمومية لمناقشة تعديلات اللائحه الاساسية وانه قرر عرض اللائحه عليه اولاً .
وقال ان تدخل الفيفا جرس انذار عالى الرنين لكل الجهات المسئولة فى مصر بداية من المجلس العسكرى الى الحكومة الى المجلس القومى للرياضة .واشار صادق انه اذا لم توقع عقوبات على النادى المصرى بهبوطه درجتان او ثلاث درجات على الاقل سيقوم الفيفا بتوقيع عقوبات على المصرى بالشطب او التجميد .