أسماء محفوظ :

ما عنديش رخصة قيادة علشان يبقي عندي B M W

بعد فترة طويلة من الصمت وعدم الرد علي كل ما قيل عنها علي الفيس بوك والعديد من المواقع الالكترونيه قررت الناشطة السياسية اسماء محفوظ الرد اخيرا وذلك من خلال فيديو قامت بوضعه علي اليوتيوب والفيس بوك قالت فيه » أنا اسمي اسماء محفوظ عضوه سابقة ومؤسسه في حركة 6 ابريل .. سيبتها بعد الثورة بسبب مشاكل اعلامية وتصريحات متلخبطه , فقررنا اننا ننفصل ونفضل في تعاون مستمر .. وانا دلوقتي عضوه في حزب التيار المصري وده حزب مازال تحت التأسيس ..
ساكنه في عين شمس , في شقة بسيطه في شارع اسمه احمد عصمت , ووالدي علي المعاش وكان مدير مدرسة ومدرس رياضيات , ووالدتي ناظرة مدرسة ثانوي وهي كمان طلعت علي المعاش السنه دي .. عندي ثلاث اخوات ..
اخ مقدم جيش واخ كان ضابط شرطة وسابها بسبب مشاكله الدايمة مع قياداته , ودلوقتي بيشتغل sales , ولسه رافعين قضية علي الداخلية , لكن هو مش تاجر مخدرات زي مابتقولوا , ولا والدي عنده كشك سجاير .. ليا اخت مهندسه وهي متزوجه وعندها بنتين ..
اتقال عني اني عندي عربيه bmw وعربيه a class وانا ماعنديش رخصة قيادة اصلا .. نفسي اي حد يجيبلي اي دليل علي اي تهمه بالعماله او الخيانه .. انا ما كنتش عايزه ارد لكن بعد فقترة طويلة قوي من كلامكم واسألتكم في الشارع واللي بيقولوا انتي ليه مش بتردي ؟ .. ونفسي حد في بنك يدور علي اي مستند اني اخدت تمويل .. وانا واخواتي ووالدي ووالدتي وعيلتي كلها ماحدش عنده منهم عربيه bmw
.. وماعنديش فيلا في 6 شارع البرديسي وماعنديش فيللا في التجمع الخامس .. بيتقال انتي ليه بتسافري كتير , واني عميله للخارج واني كل ما بسافر برجع بمصيبه .. الكلام ده مش صحيح ..
انا فعلا ممكن اكون بسافر كل شهر او شهرين لما بتجيلي دعوة من الخارج واللي بيصرف علي السفريات دي هو الراعي او المنظم للسفرية .. زي بولاندا مثلا كان الدعوة موجهه من وزارة الخارجية البولندية , وروحنا وقابلنا قيادات الثورة البولندية اللي اتعملت من 20 سنه واللي صرف علي الرحلة هم الرعاة الرسميين وهم مجموعة شركات حبوا يعملوا دعاية ..
وسفرية امريكا اللي روحتها من اسبوعين ثلاثة كانت علي حساب الجالية المصرية هناك علشان نناقش حق تصويت المصريين بالخارج , وهناك انتقدت السياسة الامريكية وشاركت في مظاهرات وول ستريت .. ممكن مايكونش ليا حق اني اشارك معاهم لاني مصرية لكني شاركت كدعم ليهم ..
وهم كمان دعموني وفكرنا نعمل حركة التغيير العالمية اللي ابتدت في الربيع العربي ودلوقتي بقي تغيير في العالم كله بهدف ان مايبقاش في دكتاتورية في العالم.. وانا بحب اسئلتكم ونقدكم لمن مش بحب انكم تصدقوا اي اشاعات مصدرها بعض الاشخاص اللي عاملين قنوات مالهاش لازمة او اشخاص بتكتب في الجرايد لمجرد انهم يحاربوا شباب الثورة ..
احنا بجد بنتحارب حرب وحشه قوي وبيحاولوا انهم يشوهوا صورتنا ويشوهوا صورة الثورة .. لكن انا كان عندي امل ولسه عندي امل ان انتم اللي هاتدعمونا , حتي حزب الكنبه اللي بقابلهم وبيقولولي انا حزب الكنبه لكن انا مع الثورة وانا معاكم وبندعيلكم , انتم بجد اللي بتقوونا وانتم اللي بتساندونا وانتم اللي بتدونا النفس اللي بنتنفسوا وبتدونا الحياة والامل للمستقبل ..
وانا بشكركم علي دعمكم ومحتاجه دعمكم تاني .. ومستنياكم يوم 28 نوفمبر في الانتخابات.