طريق النور

ديجول المصري

آن الأوان يا مصر تصحي وتفوقي وتنسفي من سكتك كل الموانع‮.. ‬وتعلمي ولادك وشبابك يعيشوا في الواقع‮.. ‬ويعرفوا إن المشوار طويل وان الحرية طريقها مليان شوك وقهر وظلم وفساد وحيتان وضفادع‮.. ‬وعصابات لسه بتنهش في عرضك وأرضك وبتحلم بكرسي في أي موقع م المواقع‮.. ‬وعصافير الأرض الأمنية طلة من الشاشات تبث في سمومها وبتقتل كل خطوة جريئة جاية بفرحة وقلب صادق يدافع عن ترابك‮.. ‬
لسه السؤال محروم‮.. ‬لسه الكلام مكتوم‮.. ‬لسه كل واحد فينا بيخون التاني كل ليلة ويوم‮.. ‬ومش دارين بالهجوم الكاسح من أنصار لجنة السياسات والأخوة والأخوات المرشدين والمرشدات‮ ‬وعبدة البيادات والنجوم‮.. ‬التوهة واخدانا‮.. ‬والغفلة محوطانا‮.. ‬وعمرنا بيتسرق قدام عنينا وكابوس المصايب والمشاكل والمتاعب زاد وغطي وبيطاردنا نهار مع ليل حتي في ساعات النوم‮.‬
ياريت نفوق ونعرف حقنا مع مين‮.. ‬وراح لمين‮. ‬وننسي عبادة الفرعون ونتأكد إن الزمن اللي جاي ألوانه رمادية ومعدش شيء مفهوم‮.. ‬ونفضل ندور في ساقية عرقانة وهفتانه لا بتروي عطش محروم‮.. ‬ولابتشفي عليل مغموم‮.. ‬ولا بتمسح دموعه اللي فيها‮ ‬غيوم وجبال كتير م الهموم‮.‬
يا جماعة العلم والفكر والسياسة والتغيير‮.. ‬مش عايزين تغيير مواقع‮.. ‬عايزين تغيير للواقع‮.. ‬وإن كنا في مرحلة انتقالية‮.. ‬لازم تكون فعليه ووراها ألف مليون دافع ودافع‮.. ‬وبلاش سباق علي السلطة وقبل ما تبنوا ليكم مجد شخصي ابنوا حيطان الدولة اللي اصبحت بين إيديكم سبوبة ومقاولة وألوانها طلت علينا قبل أوانها بلون صارخ وفاقع‮.. ‬والمحاكمات والمشاورات والمداولات صبحت زي الحكاوي‮.. ‬والتمثيليات والكتابات والتعليقات حكايات محفوظة بنشوف احداثها في جرايدنا وشاشاتنا وكأنها اسرار حربية وصواريخ ومدافع‮..‬
مع أنها حواديت بايتة وشايطة عن ان المعزول اللي بيحب البط‮.. ‬ولابس أبيض في أبيض مع ششب وصابونة وحمامه سخن وساقع‮.. ‬والمخلوع نايم ع الشط لا اتحاكم بالعدل ولا شاف ذل وكأنه رئيس لسه بيتحكم في الخلق ونايم ولا باله‮.. ‬وكان صاحب أفضال علي مصر بضربة جوية ومدافع‮.. ‬والدنيا يا صاحبي بقت ماشية في بلدنا مصالح ومنافع‮.. ‬والكل صبح طايح بيدور علي فيلم فضايح وتوك شو ساخن مع ساقع معمول بكلام مايع رائع‮.‬
إمتي يا بلدي تفوقي بجد‮.. ‬ويطلع من ضهرك راجل مسئول‮.. ‬يفكرنا بزعيم الثورة في فرنسا ديجول‮.. ‬يبدأ من تاني محاكم ثورية حقيقية والحق يرجع للشهداء علي طول‮.. ‬والأم الصابرة بعد الصبر تنول‮.. ‬ودمع عينيها يجف وتفرح بعد ما حزنها طال ولسه ح يطول‮.‬
ما دام إحنا لسه بندور علي فارس يرفع رايه العدل وبعلمه وعمله يصول ويجول‮.. ‬ويحاكم المخلوع من تاني علي تجريف مصر وتخريبها وفساد أهل الذمة من الحاشية الفاسدة بقانون رادع مسئول‮.. ‬ولا ينسي جرايم جماعة الأخوان مرشدهم وعريانهم وشاطرهم وإمامهم المعزول‮.. ‬دا خراب مصر كان جاي علينا بالمستعجل وبعلم وصول‮.. ‬لولا عناية ربي الإلهية وناسها وتاريخها وماضيها وحاضرها ومستقبلها المحفوظ والمنقول‮.. ‬دي مصر بلدنا محفوظة في قرآنه وح تفضل مرفوعة الرأس علي طول‮.‬
إمتي يا ولدي تعرف قيمة الأرض‮.. ‬وتصون العرض‮.. ‬وتصلي الفرض‮.. ‬وتدعي من قلبك إن بلدنا محتاجه لكفاح وسلاح العلم يكون هو سلاحك ولا نحتاج نمد ايدينا‮.. ‬ولا نحتاج قرض‮.. ‬وشعارنا يكون الكل في واحد هلال ويا صليب ح نعيش مع بعض‮.. ‬دا الدم الواصل لوريدي وبانقله من جدي لحفيدي خليطه ممزوج من طين الأرض‮.. ‬ولو جالنا ديجول المصري ح نشيله في عنينا‮.. ‬ونهتف باسمه ويرسم خارطة جديدة لطريقنا بخطوط الطول والعرض‮.‬
وتاريخنا نكتبه من تاني بإيدينا بفرحة جديدة‮.. ‬وثورة جديدة‮.. ‬تفجر ينابيع الحب في شبابنا البكر الغض الرافع دايما راية الحب‮.. ‬ودايما مش عايز ظلم‮.. ‬عايز حد ياخد بايديه بكرامة وعدل‮.. ‬ونكتب من تاني للعالم حدوتة أمجادنا ونعرضها علي شاشة القلب قبل شاشات العرض‮.‬