فركش

جبر الخواطر..حكاية حب

** لاتمر مناسبة يتحدث فيها الرئيس السيسي إلا ويترك أثراً إيجابياً مضيئاً وراحة نفسية في قلوب الناس.. كلمات الرئيس في عيد العمال منذ أيام كعادته خرجت من القلب بدون ترتيب وبكل صدق وكأنه بيتكلم مع إخواته أو أسرته أو أصحابه.. وتوقفت عند جملتين الأولي "لما المعاشات والأجور تزيد شوية مش معناه إن ده نتايج الإصلاح الاقتصادي.. لا.. لسه بدري.. ولسه كتير".. شفتم الشفافية والنزاهة قد إيه في الكلام.. من يوم ماعرفناه ماضحكش علي حد بره وجوه لأن قلبه نضيف وبيتكلم بطبيعته التي لاتعرف الغش والخداع.. والجملة الثانية لما بيقول للشعب "إنتم جبرتم بخاطري".. وهوه ده اللي قلته قبل كده إن المسئولية بين الريس والشعب مشتركة عملاً بالمثل الشعبي"القفة أم ودنين يشيلوها اتنين".. الريس متأكد إن الشعب لما يستحمل يبقي بيجبر بخاطره.. والشعب متأكد إن الريس بيرد الجميل.. الشعب وريسه حكاية حب متبادلة يتحدث عنها العالم ويسجلها التاريخ.. يارب ديمها علينا نعمة.. قولوا آمين.
** بدأنا إمبارح صيام الشهر الكريم.. نفوسنا صافية بدون حقد ولاغضب ولازعل ولانفسنة.. ولو كل واحد فهم كويس إيه اللي هايحصل يوم القيامة هانخللي السنة كلها "رمضان" ولو حتي في التعامل مع بعض.. يارب تقبل صيامنا وصلاتنا ودعاءنا وتسبيحنا واستغفارنا وتوبتنا.. فأنت سبحانك أرحم الراحمين.. آمين.
** أكثر حاجة فرحتني زحام الأسواق ومحلات الفراخ واللحمة.. الكل بيشتري فرحانين بقدوم شهر الخير.. وده معناه إن الناس عرفت تتعامل وتكيف إمكانياتها المادية مع الظروف الاقتصادية.. مش باقولكم شعب ملوش مثيل ولاعنده كتالوج.. كل سنة وانتم أفضل وأكثر راحة وأماناً.
** فعلاً.. من جاور السعيد يسعد.. أتكلم عن الدول الأفريقية التي اقتربت كثيراً من مصر.. العالم كله بقي يخطب ود القارة السمراء لأن مصر تقودها الآن.. ولسه الخير جاي كتير إن شاء الله.
** الأسبوع اللي فات فوجئنا بالأخ مدحت شلبي يشن هجوماً شرساً ضد الحكم محمود البنا ويتهمه بالتحايل وادعاء الإصابة.. ولما البنا رد في الحال.. صمم شلبوكة علي اتهامه بشكل تهكمي في سخرية غير مقبولة.. طبعاً أكيد فيه سبب.. ومعقولة يقول إن نايل سبورت بقت بتتشاف لما اشتغل فيها.. يانهار اسود.. طبعاً معاه حق لأن محدش قادر يرد عليه..واللا رأي أسامة البهنسي إيه..!!
** واضح كده من أولها إن مسلسلات رمضان هاتبقي "معجنة" كبيرة وهانشوف "عك" وتكرار.. وريما مش هاتنسي عادتها القديمة..لكن غياب القدير عادل إمام أفقد المشاهدين متعة.. وخلينا نشوف وبعدين نحكم..!!
** لما قلت إن الجماعة بتوع "مسرح مصر" ظاهرة مؤقتة ماكنتش بافتري عليهم.. من يومين اتذاعت مسرحية جديدة بعد توقف كبير ولأنهم انكشفوا فيما قدموه من سينما ودراما.. الجمهور ماضحكش علي إفيه واحد منهم..وشوفوهم في رمضان هايعملوا إيه.. بس هاسأل أشرف عبد الباقي "ضميرك مستريح..ماظنش ياحبيبي".. ورزق ناس علي ناس..!!
** مازالت مروي محمود محتفظة بلقب أحسن مخرجة في التليفزيون مش الفضائية المصرية بس.. عملت حتة دين حلقة عن عيد تحرير سيناء مع المخرج علي بدرخان.. تحفة فنية وصورة جميلة نفتقدها علي كل الشاشات.. برافو.
** تخيلوا كل الناس بتتفرج علي ماتشات الدوري عشان تستمتع إلا ماتشات بيراميدز كل الناس عاوزينهم يتغلبوا..طبعاً السبب معروف..!!
** إلهام أبو الفتح.. قيادة إعلامية محنكة وفاهمة وواعية وتستحق لقب "تاتشر" الفضائيات.. يابخت صدي البلد بيها.
** محدش يدخل ماسبيرو إلا ويتساءل "التغييرات الإعلامية إمتي".. طبعاً لأن قياداته بيشتغلوا لنفسهم وبس.. والناس بقت علي آخرها.. والفشل عنوان عريض.. والله يرحم الإعلام الرسمي والدراما المحترمة والناس الحلوة والقيادات الجامدة.. ورمضان كريم.
** نائلة فاروق: الناس في التليفزيون مش عارفين يشوفوكي عشان يقولولك "نعيماً..وبالهنا والشفا.. مش هاتوحشينا.. هاتوحشي مجدي لاشين ورجالته"..!!
** كل المذيعين والمعلقين بيروجوا لشوية لاعيبة عشان يدخلوا المنتخب.. حرام عليكم هاتروحوا من ربنا فين..!!
** كام عضو بيفتكر سحر الهواري في مجلس الجبلاية..الكدب حرام ..!!