فركش

بعد الشر عنك..

** كم زادت شعبية الرئيس السيسي وهو يتكلم بقوة وحسم مهدداً كل من يحاول العبث بمقدرات البلد وبعقول شعبها الواعي الناصح اللي فاهم الفوله وعارف مين بيدبر المكائد والأزمات لمصر.. لقد شعرت الناس الوطنية المحبة والخايفة علي بلدها قد إيه الرئيس السيسي بيخاف علي مصر وعنده استعداد تام أن يضحي بحياته فداء لها ولاستقرارها وشعبها قائلاً "أنا أموت الأول قبل ما يحصل فيها كده".. وكم سمعت كثيراً من الناس يردون علي الرئيس "بعد الشر عنك عشان خاطر مصر وخاطرنا ..وانشالله اللي يكرهك ويكره مصر وشعبها.. إحنا ماصدقنا ربنا رضي عننا وجابك تحكم مصر.. وكفاية بنشوف بلاد تانية بتقول "ياريت ربنا يجيبلنا واحد زي السيسي".. وهذه رسالة قوية لمن يدعون الوطنية وهم أول ناس بايعين البلد وعاوزين يولعوها من تاني يارب يولع فيهم بجاز وسخ ومنهم واحد شعره أبيض شفته من أسبوعين وهو خارج الفجر من فندق سميراميس وهو يترنح سكراناً ومعاه مزة شعرها أصفر ويمسكها من وسطها.. والواد التاني اللي لطش الحزب إياه بيقبض من بره ومن جوه والملطوط في سلوكه.. والبردعه اللي قبض تمن بيع العراق وكان فاكر مصر وشعبها لقمة سهلة ولو ماكنش هرب زي الفار لأوروبا كان انضرب بالجزم.. واللا الأقرع اللي بيتسول من بلاد بره.. وغيرهم وغيرهم اللي ربنا فاضحهم قدام الدنيا.. وقال إيه بيقولوا للناس قاطعوا انتخابات الرئاسة.. ياخي قطع رقبتكم.. والله الشعب هايديكم حتة قفا هايسمع من المحيط للخليج ..!!
ولما الرئيس يقول أنا مش سياسي.. يبقي أنا أفهم إنه راجل معندوش لوع وحركات وهجص وهرتلة السياسيين لأنه راجل متربي في أشرف مؤسسة القوات المسلحة اللي متعرفش غير الوطنية والوضوح والطريق المستقيم ولا تعرف الكلام اللي في الهوا.. ويقصد الرئيس أيضاً انه مش بتاع كلام عشان هو جاي يشتغل ويشتغل عشان البلد.. والحمد لله شغله باين علي عينك يا تاجر.. ولسه كمان وكمان لحد مالبلد تقف علي رجلها والشعب يرتاح في كل حاجة.
وبعدين ياحيلة أمك إنت وهو.. محدش فيكم ورانا رجولته ورشح نفسه ليه.. طبعاً عشان الناس هاتفضحكوا فضيحة المطاهر يوم خروجه ع المعاش.. تقوموا تلعبوا لعبكم الوسخ وتحاولوا تهيجوا الناس.. والحمدلله ربنا خيبكم والناس كشفتكم.. ويااااارب ياخدكم ويخلصنا منكم.. قولوا آمين ..!!
نروح بقي للأخ عمرو اديب فذلوك عصره وأوانه.. بيسمي شوية المرتزقة دول معارضة.. لكن شوف عماد أديب بيقول عنهم إيه.. سبحان الله واحد فاهم وبيتكلم وواحد مش فاهم وبيهرتل..!!
** أسامة الشيخ: بذمتك ينفع أبوحمالات يعمل البرنامج ده عشان يقرأ الكتب والمذكرات للناس.. صحيح.. رزق ناس علي ناس ..!!
** وولاد الكحكي " علاء وعمرو": أخيراً أشهرتم إفلاسكم الإعلامي عشان ترجعوا "محموق أفندي" يهجص ومايعرفش يقول كلمتين.. ومعاه "قرموط باشا" ببرنامج لف بيه كل القنوات.. الله يسامحكم.. والناس مش مسامحاكم ..!!
** تركي آل الشيخ : واضح إنك أهلاوي أكتر من أهلاوية كتير بالاسم بس ..عشان انت محترم.
** عبدالعزيزعبدالشافي.. أول زيزو في مصر.. وحياتك قول لحسام البدري.. اللي مايشتريش الأهلي يغور في داهية..!!
الاتحاد السكندري "سيد البلد": انت النادي الوحيد بعد الأهلي اللي بازعل عليه لما تتغلب.. ومش هاتهبطوا عشان راجل مخلص اسمه محمد مصيلحي.