** الله.. الله.. الله.. من معرض"إيديكس" العسكري بالقاهرة إلي مؤتمر"أفريقيا 2018" كلاكيت تالت مرة بشرم الشيخ .. كل دي رسايل إلهية بتوري العالم مصر بتعمل إيه وهي سايبة إيديها.. عشان المغيبين والتعبانين في دماغهم يتهدوا شوية.. !! ** بذمتكم مش خالد فودة محافظ جنوبسيناء يستاهل جائزة نوبل للمؤتمرات الدولية كأحسن عمدة علي مستوي العالم.. شرم الشيخ حاجة تشرفنا فعلاً. ** طبعاَ بقينا عارفين خلاص حكاية السلع والمحاصيل إللي بتختفي فجأة من السوق وأسعارها بتتجنن في ثانية بفعل فاعل وساعتها الدنيا بتقوم والمسخناتية بيولعوها في السوشيال "زفت" عشان الناس تغضب من السكر مرة ومن البطاطس مرتين والقوطة المجنونة كذا مرة.. وعشان نتأكد زيادة إن دي مؤامرات علي البلد قولولي أول أسعار الخضار والفاكهة والفراخ ما انخفضت بقالها فترة مين فتح بقه وورانا شطارته في التسخين والهيجان!!.. أكيد ولاواحد..!! نروح بقي لحكاية فواتير الكهرباء إللي الوزير أمر بمراجعتها وفتح التحقيق فيها بعد مازادت بشكل مبالغ فيه.. وياريت حد يسمعنا والمراجعة تشمل كهرباء المعادي لأنها بقت لاتطاق.. !! ** كتبت هنا عن تخفيض عدد أفراد بطاقات التموين بدون سبب.. وحسناً ما فعله الوزيرعلي مصيلحي بتصحيح الوضع.. وكفاية دعوات الغلابة تبقي من نصيبه مش عليه.. !! ** كلنا بنساند سوريا في محنتها ولو بالدعاء أن ربنا يرفع عنها البلاء.. تخيلوا الرئيس بشار الأسد الخميس اللي فات أعلن الموازنة بتاعة السنة الجاية 9 مليارات دولار بدون عجز.. شوفوا ربنا كريم قد إيه.. اللهم انصر سوريا وشعبها.. قولوا آمين. ** حاجة محترمة قوي إن التليفزيون المصري يترجم معني العروبة من خلال برنامج "مصر النهاردة" الذي استضاف الخميس الماضي مجموعة من الاعلاميين والفنانين الكويتيين في بث مشترك مع تليفزيون الكويت.. سيمفونية بين عمرو الشناوي ونائلة فلروق. ** مين سايب الأخ إسلام البحيري يبرطع كده.. ده بيشكك في الأحاديث وطبعاً مفهوم ليه.. لأنه عامل ماجستير في التعامل مع التراث من جامعة ويلز الأمريكية وبيقول علي نفسه باحث في التراث الإسلامي.. تخيلوا بيقول" الإسلام توقف عندي في حجة الوداع عندما قال سيدنا محمد صلي الله عليه وسلم الآية "اليوم اكملت لكم دينكم وأتممت عليكم نعمتي ورضيت لكم الإسلام ديناً".. وبعدها توفي الرسول.. ده مش طبيعي خالص.. فين أولو الأمر يردوا علي جنابه.. واللا هانفضل في العبث ده..!! ** باحترم لميس جابر قووووي لأسباب كتير.. من كام يوم كتبت مقالة رائعة عن أحوال الإعلام التي لاتسر عدواً ولاحبيباً.. ولكني لا أوافقها أن الفار الهربان بالقناة الإرهابية التركية بيتكلم صح لآنه طول الوقت قليل الأدب وسافل وبكرة يقع علي بوزه.. بس المقال في الجون..!! ** وبالمناسبة.. فطست من الضحك لما شفت أيمن نور في مؤتمر "حلمنتيشي¢.. وشه اتنفخ زي البقرة الحلوب .. وجسمه شبه البغل.. واضح إن هرموناته بقت أوفر من كتر اللامؤاخذه..!! ** لما مذيع فاشل قاعد يسخن ويشعلل فيها من بعد المؤامرة الشهيرة يتنقل لقناة "كبيرة¢.. ولما واحدة رد سجون تروح لمكان محترم.. وحياتكم نفهم من كده إيه.. !! ** مفيش حد يقدر يستبيح الأهلي ويفهمنا إنه عارف كل حاجة بتحصل جوه النادي مع إنه ممنوع من دخوله أصلاً.. ورغم الزعل علي غلق قناة "Ltc" لكن الناس الأهلاوية والزملكاوية مبسوطة من غياب أبو المعاطي زكي وأحمدالخضري.. ومش هاقول أكتر من كده..!! ** اللواء خالد الدكروري: حلقة جديدة في سلسلة رؤساء قطاع الأمن المحترمين بماسبيرو. ** مفيد عاشور.. إيه جبروتك ده ياأخي.. ممثل مفتري بجد.. ربنا يطول في عمرك وتمتعنا. ** أحمد ماهر.. مش محتاج تمر بأزمة صحية عشان تعرف حب الناس ليك.. ربنا يمتعك بالصحة يابوقلب أبيض. ** "زوزو" و"تيحه" بيلموا أوراقهم وبيفرموا المستندات.. فاضل دقة واحدة ياحلوين.. !! ** فيلم "الزوج العازب".. حتة دين ماتش بين فريد وهند والمليجي ومدبولي .. وكله كوم وعمنا محمد طه كوم لوحده.. الله يرحمهم كلهم. ** "سوق الدراما جبر.. واتبغددوا الوحشين¢.. بس هاتفرج.. !!