فركش

صح.. الناس لازم تعرف

** الحكاية مش محتاجة كلام..الندوات التي تنظمها القوات المسلحة وسيلة اتصال مباشرة وبلا وسيط بين الشعب وقائده .. خلالها يتحدث الرئيس ويوضح ويشرح ويصارح بالوضع القائم والظروف المحيطة .. وكانت المقارنة بين وضع البلد الآن ومابعد يونيو1967 في قمة الشفافية وما ركز عليه الرئيس السيسي حين قال "الناس لازم تعرف كل حاجه عشان الدولة تقدر تمشي بقوة".. وده مبدأ يسير عليه منذ أن تولي المسئولية وده أساس نجاح العلاقة بينه وبين المصريين مهما حصل..لأن الناس لما تعرف ها تستحمل وتسند وتصبر بس فاضل تشتغل بما يرضي الله.. وطول ما الرئيس بيقول للناس الحقيقة عمرهم ماهيتخلوا عنه ولاعن بلدهم ..وكفاية لما يحلف بالله إننا هنشوف بلد تاني في 2020 .. وبإذن الله هانشوف معاك الخير كله .
** المؤسسة العسكرية ماشية زي الساعة ومظبوطة طول العمر..أيام أن كان اللواء محسن عبدالنبي مديراً للشئون المعنوية كانت الندوات الثقافية تتم علي أعلي مستوي.. ثم تولي اللواء.أ.ح.أحمد فتحي خليفة مسئولية الإدارة ولم يختلف المستوي عن ذي قبل بل شهدنا تطويراً وتطوراً في الأداء وهذه هي عظمة القوات المسلحة لاتتوقف عند مستوي معين بل تتقدم إلي كل ماهو جديد.. ومازالت الاحتفاليات بالنصر المعجزة مستمرة وكل سنة وجيشنا الأعظم بخير وتوفيق وسداد.
** لم ولن تقدر تركيا ولا العالم علي المساس بشعرة من مصر رغم ماتدبره من مكائد وقيادة ودعم للإرهابيين عيني عينك.. لذلك ماتتعرض له السعودية من مؤامرة ليس جديداً علي تركيا ولا علي أمريكا ولاعلي أعداء استقرار الدول العربية ذات الثقل الاقتصادي في العالم.. وحكاية مقتل الكاتب السعودي جمال خاشقجي لعبة مفضوحة قوي ولاتخيل علي عيل صغير.. فالسعودية منذ نشأتها لم تلجأ لمثل هذه الأساليب القذرة.. وجاء بيان المملكة أول أمس في منتهي القوة والحزم ليوقف المتربصين ومن تسول له نفسه اللعب مع السعودية.. ولنتذكر مسرحية قانون جايكا "المشموم".. ولاننسي ريحة الموساد في الحكاية..!!
** بصراحة.. أسامة الشيخ رئيس قناة "أون سبورت" راجل محترم في مكان محترم..واعتذاره عن خطأ لم يرتكبه لاهو ولاقناته في حق فريق ناصر الفكرية يدل علي القوة والثقة واحترام الغير.. لكن لابد من الاستغناء عن خدمات المعلق محمد الشاذلي لأنه إعتاد التريقة علي كل الفرق بما فيها الكبار .. فالقناة في غني عن الوقوع في خطأ آخر..!!
** وبصرحة كمان أسامة الشيخ وإيهاب جلال ناس محترمة وشالوا الكلام الفارغ اللي علي شاشة بيراميدز بعد مانبهتهم هنا الاسبوع الماضي.. ومتشكرين.
** تصوروا..لما كتبت الاسبوع الماضي إن نائلة فاروق بتقعد في المكتب لبعد نص الليل فيه ناس اتصلوا بعد الساعة "11" وناس راحوا سألوا عليهاعشان يتأكدوا ولقوها موجودة ..مبكتبش حاجة كدب ..!!
** ياتري القناة الأولي هترجع مشاهديها تاني..واللا هانفضل نشوف نشرة الأخبار وخلاص..!!
** متهيألي فيه حد بيتخانق مع حد تاني علي تورتة الفضائيات.. ومتهيألي إن الخناقة دي هي اللي جابت وائل البراشي المسخناتي من دريم لحد "أون" ورجعت لبني عسل للحياة وجابت شريف مدكور للحياة من النهار وبرضه رجعت محموق سعد للنهار .. و"CBC" فيها حاجة غريبة .. وبالمناسبة برافو تامرمرسي ملك الدراما في الكرة الأرضية..ربنا يوفقك..!!
** كابتن هاني رمزي: وحياة أبوك تبلغ الخواجة أجيري إن "طارق حامد ومروان محسن وعلي جبر ومحمدالنني" مينفعوش لاعيبة كورة..وارحمونا منهم ربنا يكرمكم..!!
** هند رشاد: من أحسن وأجمل مذيعات القناة الثانية..لكن مش واخده حقها..الصبر طيب..!!
** "تيحة" السكرتير المعجزة بطنه ماشية عشان الحكاية قربت تخلص..!!
** شفتم الوسط الرياضي بقي هادي إزاي..ربنا يبعد عنا أحمد حسن..قولوا آمين..!!