** عشان تعرفوا إن مصر كبيرة وعظيمة قوي قوي طول عمرها.. شوفوا المبادرات الوطنية اللي بتتعمل لمصلحة المواطنين وبتضرب الجشعين اللي مش بيهمهم معاناة الناس.. بصراحة حاجة تشرف وتفرح مبادرة وزارة الداخلية تحت اسم "كلنا.. واحد" حيث يتم تنظيم معارض ثابتة ومتحركة لبيع مستلزمات المدارس التي ارتفعت بشكل مفزع وخلت الناس تصرخ.. تصوروا المبادرة بتبيع الحاجات بنصف الثمن وعليها إقبال نظراً للثقة في أي مشروع يكون تحت رعاية الرئيس السيسي وهذا مادفع التجار الوطنيين من منتجين وعارضين للمشاركة بقوة وحماس ولابد من توجيه التحية والتقدير لهم.. وفيه معرض كمان هاتنظمه وزارة التموين.. يعني محدش يفكر يلعب علي مشاعر الناس.. لأن الشعب اللي قدم درساً للعالم في ثورة 30 يونية هو اللي بيقدم الدروس للعالم في السير ببلده خلف قائده وجيشه وشرطته.. ويا بختك يامصر بشعبك اللي ربنا كرمه في القرآن الكريم.. وتحيا مصر رغم أنف ولاد ال "تيت". ** لسج فيه كتائب إليكترونية خائنة من الأعداء بتحاول تلعب لعبتها القذرة.. فجأة هاجت الزفت السوشيال هباب علي سور يتم بناؤه علي كورنيش إسكندرية.. والحقوا التاريخ وبيخنقوا الناس وبيدمروا الكورنيش.. ونكتشف أن الحكاية كلها كام متر تحت كوبري سيدي جابر أمام مشروع مقام أساساً.. ولكن ولاهايقدروا يسخنوا الناس لأن الأسكندرانية جدعان ورجالة وفاهمين الفولة وشوفوا موقفهم الوطني العظيم في ثورة 30 يونية.. وبرضه تحيا مصر. ** سألت أحد المحترمين عما يجري في الفضائيات الخاصة بالنسبة للمذيعين والمذيعات اللي كانوا مولعين في البلد لصالح الأجندات الخارجية والداخلية واللي انتشرت مستندات تفضحهم.. واللي بيتم تحريكهم من قناة لأخري وكأنه تتم مكافأتهم علي ما فعلوه أوعلي حاجة إحنا منعرفهاش.. ولم يرد عليا المحترم.. وهنا أطالب بتوضيح الحقائق أو إذا ماينفعش حد ينورنا.. يقولوا ماتتكلموش في الحكاية دي وهانحترم ده!! ** مني الشاذلي اللي لقاءاتها مع وائل غنيم وقادة الإرهابيين في برامجها من أول 2011 وحتي 2013.. قامت بقص 15 سم من شعرها لصالح مرضي الأورام.. والسؤال "هو شعرها كله لو ماكنش باروكه هايساوي كام ؟".. إنه الشو يا سادة ومحاولة غسل ما تم ارتكابه.. وربنا يتقبل!! ** من وجهة نظري المتواضعة.. قدمت هيفاء وهبي أجمل وأحلي وأقوي حوار من يوم ماشفناها علي قناة "mbcمصر" من يومين.. انطلقت في تلقائية وحكت أسراراً عن حياتها الشخصية والعائلية في حدود المسموح.. واللي خلاها كده هو صمت عمرو أديب كثيراً وعدم مقاطعتها!! ** ومن وجهة نظري البسيطة جداً.. قناة "ON سبورت" أفضل وأحسن قناة رياضية في الشرق الأوسط لأن قائدها أسامة الشيخ ناصح بشكل كبير وفاهم جداً.. وسيف زاهر أحسن مقدم برامج رياضية وستوديو تحليلي.. وطبعاً أحمد شوبير خارج المقارنة لخبرته الطويلة.. وكل سنة وانتم بخير في عيد ميلاد القناة الثاني. ** كده أقدر أقول بالفم المليان إن دوري كرة القدم هايكمل علي خير وكل واحد هايعرف حجمه الحقيقي واللي بيزوروا ويزيفوا الحقائق بمقابل مادي كبير هايتخرصوا!!