فركش

الأهلي بقي ضد الدولة

هوه كرسي رئيس النادي الأهلي بيلحس الدماغ كده لدرجة إن الواحد ممكن ينسي نفسه خالص وهوه بيتكلم ويقول أي كلام لازم يتحاسب عليه لما يتهم الدولة حالياً بأنها وصمة عار وحالتها أصعب من مؤامرة الأيام الهباب (2011- 2013 ).. ده اللي حصل في ندوة اتذاع جزء منها في برنامج" مع شوبير" بقناة صدي البلد الوطنية مساء السبت الماضي .. تصوروا المهندس محمود بيه باشا طاهر بعد مامرط الأرض باللجنة الأوليمبية المصرية وبوزير الرياضة وإحنا عارفين إن اللجنة هي المسئولة عن الرياضة في مصر بدلاً من وزارة الرياضة يبقي اللجنة هي الدولة في الجانب الرياضي ..يقوم "الباشمهندز" رئيس النادي الأهلي يقول إذا كانت اللجنة الأوليمبية بتمثل الدولة تبقي وصمة عار.. ويبقي كده الدولة اتشمت عيني عينك جهاراً نهاراً واللا إيه .. وبعدين يزيد البلة طينة ويقول إن الحالة دلوقتي في البلد أصعب من الأيام السوده بتاعة 2011 .. يانهار كوبيا متعاص بهباب .. حد يقول كده .. ده محمود باشا طاهر تفوق علي الإخوان الإرهابيين اللي ميعرفوش يقولوا كده دلوقتي ..هوه الباشا مش شايف المشروعات والتنمية اللي بتحصل كل طلعة نهار.. طبعاً ماهو مش عايش معانا عشان شركة البترول مع شركة أرامكو الأمريكية في لندن .. وكمان تقول إيه هي مبادئ وقيم الأهلي اللي بيتكلموا عليها .. وطبعاً إنت ماتعرفهاش لأن الناس سمعت عنك من 3سنوات بس وكل ده عشان كرسي رئيس النادي اللي قعد عليه قمم وقامات تاريخية ووطنية خدمت البلد في الأوقات الصعبة ومحدش قال كلمة ضد البلد وحافظوا علي قيمة وحجم ووطنية الأهلي علي مدار 106 سنوات من اول ميشيل إنس وعزيز عزت باشا وعبدالخالق ثروت باشا والفريق مرتجي والمايسترو صالح سليم لحد وزير دفاع الأهلي كابتن حسن حمدي وبعدها جاء بلاء ربنا للأهلي في لحظة غضب عليه 2014بواحد مرمغ راس النادي الأهلي في التراب ويخلي اللي يسوي واللي مايسواش يشتم النادي .. ومش هاتكلم عن ملايين الجنيهات اللي بتتصرف علي الدعاية ومحدش عارف منين كل الفلوس دي .. وبعد كده يطلع "عضو" إسمه كامل زاهر من عيلة محترمة جدا ويجافي الحقيقة ويفتري في لقاء تليفزيوني أول إمبارح وطول الحلقة بينسي الكلام اللي بيقوله ..ويطلع كمان مرشح "صغنطوط" في قايمته إسمه أحمد مصطفي وسأله سيف زاهر عرفنا بعائلتك الرياضية فقاله والدتي كابتن هناء حمزة وجوز بنت الكابتن ضياء السيد وفي غرابة شديدة ماقالش إسم حد تاني مع إن أخته مريم لاعبة طائرة وجوز خالته الكابتن الكبير إبراهيم عبد الصمد .. وقعد يمجد في رئيس قائمته ويكاد يبكي ويقول والنبي تنتخبونا .. وبالمناسبة المذيعة هناء حمزة اللي طالعة علي المعاش قريباً تم إيقافها من برنامج أصداء الملاعب بقناة نايل سبورت لأنها هاتعمل برنامج عن الانتخابات بقناة الأهلي لتأييد قائمة إبنها.. وإياك أسامة البهنسي ينكر وإلا يسأل "عبدالفتاح" .. وماأحزن السبعين مليون أهلاوي لما شافوا "أبوزيدالهلالي خليفة" وهو بيهتف للباشمهندز في عصبية وتوتر ونسي الكابتن بتاعه اللي احتضنه وهو شبل ليضرب أعلي مثال للوفاء وهو يعلن كراهيته له علانية..بعكس الكباتن
2
المحترمين إسماعيل يوسف وأحمد ناجي وأحمدشوبير ومحمديوسف وغيرهم اللي بيساندوا " كابتنهم" عشان مصلحة الأهلي .. واللي مجنن الأهلاوية إنهم مش مصدقين إللي الممثل هشام سليم اللي بيقوله عن "بيبو".. وهو اللي وافق إن ممثلة مفعوصة تحط إسمها قبله في مسلسل .. يبقي إبن المايسترو الراحل صالح سليم .
وآاااااه.. لو كان من حقنا نحن جماهير الأهلي التصويت .. ولكن لأن " لو" من الشيطان .. فإن ثقتنا كجماهير نضعها في الجمعية العمومية المحترمة والحكاية مش كرسي وشمسية وترابيزة .. ونضع الأهلي أمانة في رقبتكم.. وصدقوني .. والله العظيم تلاتة .. ده لامحمود.. ولاطاهر.. لأن الأهلي طول عمره مع مصر مش ضدها.
وخللوا بالكم .. أنا ماجبتش سيرة الخطيب.