تعرف على نص المكالمة المشبوهة بين مسئول لجنة الحكام ومسئول الجبلاية

حصلت جريدة الموجز على نص المكالمة المشبوهة بين رئيس لجنة الحكام وعضو بالجبلاية والتى وصفها الاعلام بكارثة الحكام الملاكى والتي قام الزميل محمد شبانه بنشرها علي صفحات جريدة الاهرام المسائي
وجاء نص المكالمة كالتالى .
مسئول فى الجبلاية : ها يا كابتن ازيك.
مسئول فى لجنة الحكام : الحمد لله ياباشا .
مسئول فى لجنة الحكام : كنا عايزين نتكلم مع بعض يا كابتن شوية .
مسئول فى الجبلاية : أأمرنى .
مسئول فى لجنة الحكام : نقعد مع بعض نشوف هنعمل إية الفترة اللى جاية والأمور أن شاء الله والدنيا تتظبط كدة والأمور تبقى كوسة.
مئول فى الجبلاية : أنا مسافر عمرة .
مسئول في لجنة الحكام : هتيجى إمتى إن شاء الله .
مسؤول في الجبلاية: هاجي السبت .. والاحد هكون معاك.
مسؤول في الحكام : ماشي.. تقبل الله منك.
مسؤول في الجبلاية: ماتشغلش بالك .. أنا عارف أن فيه حروب بين المجلس نفسه ، وانا مساند "ج" في قراره و "ع" مصر ومتمسك بوجودك و"...." اللي أسمه جمال الغندور عامل تكتلات عشان يجي، أحمد ".." من ناحية ، وكذا عضو من ناحية، وكابتن حسن فريد النهاردة انا كلمته ومحمود الشامي وحمادة المصري، يعني معانا لوبي فيه 6 أعضاء، بس عايزين المرحلة التانية دي ياكابتن نعديها ، يعني امبارح محمد فاروق كان 10 على 10 ، محدش يقدر يتكلم ، وكلمت رئيس الزمالك وقلتله أظن مالكش كلام.
مسؤول في لجنة الحكام: ده طلع مع خالد الغندور قال التحكيم محترم، وخالد قاله مش عارف إيه والحكاية والرواية والبلاغ اللي أنت مقدمه قاله الكابتن "...." ملوش دعوة بالرشوة ، كابتن "....." متفق مع المجلس إنه هيمشوه في يناير، لكن بالنسبة للرشوة هو ملوش دعوة بالرشوة، الرشوة دي كان حكام ومتفقين عليا وعايزين يحطموا ويخسروا النادي، ولكن كابتن "...." ملوش دعوة بالرشوة خالص وهو بعيد عن الموضوع ده.
مسؤول في الجبلاية: تمام لأ هو غلبان ، خلي بالك ياأستاذنا أنا لما اتكلمت معاه أنا قعدت معاه قلتله عشان خاطري أجيبلك مين ؟.
عايز تجيب جمال الغندور يبيعك ولا عصام صيام، يا عم خليك في اللي نعرفه يكفي إنك تبقى واحد نضيف ، وقلتله بعد إذنك إنت ليك حاجة واحدة قبل الماتش، إحنا مش هنجيب".. " قالي أنا مش عايز حد يحكملي ، أنا مش عايز حد يبقى عليا.
قلتله: جميل هنجيبلك حكام دوليين محترمين.
مسؤول في الحكام: وأنا جايبله حكم هو بيحبه وهو مبسوط منه.
مسؤول في الجبلاية : ده اللي هو مين؟ ماتش إيه.
مسؤول في الحكام: ماتش الزمالك والمقاصة.. جهاد جريشة.
مسؤول في الجبلاية: زي الفل.
مسؤول في الحكام : تمام.
مسؤول في الجبلاية: ملوش حجة، زي الفل، أحسن كدة ماتقولش لحد خالص الكلام ده.
مسؤول في الحكام: لأ أنا بقولك انت بس الكلام ده.
مسؤول في الجبلاية: إنت عارف ليه أنا بسكته بالكلام ده ، عشان يبعد عننا، ماهو خد بالك هو برضو سم، أنا كدة عشان اعرفه اللي بيعمله مع كابتن "..." مش هيعمله معاك إلا أنا.
مسؤول في الحكام: خلي بالك ياكابتن "... س" إن الإعلامي "ش" كان بيقولي إنت هتلاعب جهاد اللي راح لرئيس الزمالك الصوان والبتاع عشان يسانده، قلتله ياكابتن "ش" أنا عندي جهاد محترم وكبير.
مسؤول في الجبلاية: سمعتك ياباشا.. أحسن حاجة إنك قلتله أآمنه على نفسي، سمعتك ، كلام محترم ان شاء الله ، بس متشغلش بالك وانا خلي بالك لما بلاقي فيه خطر بعمل لوبي، أنا عامل لوبي دلوقتي.
مسؤول في الحكام : أنا يهمني إنت ياكابتن، يهمني إنت أهم حاجة.
مسؤول في الجبلاية: ياباشا ماتشغلش بالك ، ولا حد يقدر يجي نحيتك، يالا ياكابتن أشوفك في الاتحاد ان شاء الله.
مسؤول في الحكام: إن شاء الله تيجي بالسلامة، بس خليه يهدى علينا ياكابتن.