فركش

فهموهم أحسن..

** مع ما تبذله الدولة من مجهودات خرافية لتحسين أحوال الناس ورفع معدل النمو والسير قدماً بالاقتصاد لأعلي.. لكن مش كل الخلق بتفهم يعني ايه موازنة عامة للدولة ولا معني الشهادات الدولية بأن اقتصادنا يتعافي وينمو وكل اللي يهمهم الأسعار والأكل والشرب.. وللأسف ليس لدينا مسئول اقتصادي واحد بيخرج يشرح للناس الكلام ده ببساطة عشان لما يفهموا مش هايشتكوا وهايعرف احنا بنعمل ايه وايه النتيجة المنتظرة.. لكن بنلاقي وزير ولا وزيرة بيقول الكلام المجعلص اللي هو فاهمه مع المتخصصين.. باقول الكلام ده عشان شاب معرفتي عنده "42 سنة" زعلت عليه قوي لأنه بيقرا الهرتلة علي السوشيال زفت وبيصدقها ومش فاهم حاجة مع انه دارس تجارة ومحاسبة واقتصاد والمفروض أنه فاهم الوضع كله.. لكن للأسف غسيل الدماغ شغال علي ودنه والله يخرب بيت الإنترنت والمواقع والهباب ده.. ويااااارب حد يسمعنا ويطلع في مؤتمر يتذاع علي كل القنوات ويفهم الناس.. وارحمونا وارحموا البلد والناس الله يخليكم!!
** وتظل القوات المسلحة مدرسة الوطنية والأصالة والاحترام والانتماء.. وتظل الشئون المعنوية منارة للإعلام والثقافة والأدب.. أنحني أمام صاحب فكرة الميدالية البرونزية لتخليد أبطال مكافحة الإرهاب.
** فعلاً بننفخ في قربة مخرومة.. عمالين نهاتي من سنين عشان حد يوقف شوية المذيعين اللي مسخنين الدنيا ومولعينها ولا حياة لمن تنادي مع إن الدنيا كلها عارفة مين دول وبيعملوا ايه وبيقبضوا منين وليه.. وسايبينهم يبرطعوا في تكية أبوهم.. وعاوز أقول طالما عاجبكم بلا حرقة دم.. وعلي رأي جحا.. خلاص!!
** أصحاب المصالح اللي قطعوا تركي آل الشيخ عشان عاوزين يستفيدوا دلوقتي بيسبحوا بأعماله وأظن كل اللي قلتلهم مرتضي منصور دايماً علي حق صدقوني دلوقتي وكل اللي بيشتموه خسروا الجلد والسقط.. انكسفوا شوية بقي ولعبتكم انكشفت ومش هاتقدروا توقعوا بين تركي والخطيب ومرتضي.. جاتكم خيبة!!
**لما محكمة الجنايات تحط إللي مايتسمي أبوتريكة ضمن قائمة الجماعات الإرهابية للمرة التانية يبقي أي عميل هايجيب سيرته من حقي أقاضيه إنه بيدعم وبيساند وبيلمع "الإرهاب والإرهابيين".. ده حكم قضائي يابا.. وقد أعذر من أنذر..!! ده بيقولك هاندفن في قطر أو غزة عند موزة أو حماس!!
** سؤال للمسئولين عن نادي حرس الحدود: صحيح هاتجيبوا أحمد عبد الظاهر من المقاصة؟!.. أنتظر الإجابة.
** يانهار أسود حسام وأخوه إبراهيم نسيوا نفسهم وبيعملوا دماغهم بدماغ الأهلي والزمالك والإسماعيلي في البطولة العربية.. اتعلموا من الاتحاد السكندري "سيدالبلد" وعمكم محمد مصيلحي!!
** منار سالم: صوت إذاعي مصري رائع ومثقف ينير إذاعة الكويت.. ياريت نادية مبروك تسمعها يومياً من 4-5 عصراً.